Qazaqstandyq áskerıler halyqaralyq «Aravt» marafonyna qatysady

ASTANA. QazAqparat - Elimizdiń áskerı qyzmetkerleri Mońǵolııada ótetin «Aravt» halyqaralyq attar marafonyna daıyndyqty bastady, dep habarlaıdy QazAqparat QR Qorǵanys mınıstrligine silteme jasap.

«Ońtústik» óńirlik qolbasshylyǵynyń taý-qoryqshylar bólimshesinde 2019 jylǵy halyqaralyq armııa oıyndary sheńberinde «Aravt» halyqaralyq attar marafonyna daıyndyq bastaldy. Aravt - bul 10 adamnan turatyn atty jaýyngerler rotasy.

Qazaqstan armııasy atalǵan sharaǵa qatysýǵa nıet bildirdi. Qazirgi ýaqytta taý-qoryqshylar bólimshesinde 10 negizgi jáne 3 qosalqy áskerı qyzmetkerden turatyn komandany qurý úshin irikteý júrgizilýde», - delingen habarlamada.

Komanda quramyna snaıper, pýlemetshi, granata atqysh, baılanysshy, saper, mergen jáne medıtsınalyq nusqaýshy kiredi. Saıys eki kezeńnen turady. Birinshi kezeńde atty jaýyngerler taýly jáne ormandy jerler arqyly 130 shaqyrymdyq sý joly men mınalar alańynan kedergisiz ótýi tıis.

Sondaı-aq, arqannyń kómegimen atty ustaý, ony júgendeý jáne ertteý qajet, sol sııaqty at ústinde jaraly áskerıler men oq-dárilerdi tasymaldaý tapsyrmasy bar.

Ekinshi kezeńde áskerı qyzmetkerler belgilengen ýaqyt ishinde kedergiler jolaǵyn eńserý men áskerı qarýmen oq atýdan básekege túsedi. Odan bólek, ornynda turyp jáne atpen shabý barysynda granata laqtyrý synaǵy qarastyrylǵan.

«Aravt» - halyqaralyq armııa oıyndary quramyndaǵy jańa baıqaý. Marafonda attardy Mońǵolııa eli usynady, qatysýshylarǵa óziniń at ábzelin ǵana paıdalanýǵa ruqsat etilgen. Qatysýshy áskerı qyzmetshiniń salmaǵy 85 keliden aspaýy tıis, sondaı-aq, jarysta jiberilgen árbir qatelik pen kesheýildeýge aıyppul salynady. Eń óreskel buzýshylyq jylqyny jaraqattaý, ondaı jaǵdaıda qatysýshy birden baıqaýdan shyǵady. Baıqaý ústimizdegi jyldyń tamyz aıynyń basynda Mońǵolııada ótedi», - dep habarlaıdy mınıstrlik.