Qazaqstandyq áskerı ushqyshtar biliktilikterin jetildirdi
ASTANA. 4 sáýir. QazAqparat - Áýe qorǵanysy kúshteriniń 53975 áskerı bólimi bazasynda áskerı bólimder jeke quramy men Áýe qorǵanysy kúshteri Áskerı ınstıtýtynyń jıyny ótti, dep habarlady Qorǵanys mınıstrliginiń baspasóz qyzmetinen.
Ushqyshtar quramy eki apta boıyna biliktilikterin jetildirdi. Jıynǵa Áskerı áýe kúshteri qolbasshysy basqarmasynyń basshylyq quramynan, 01852, 55652, 53975, 19132 áskerı bólimderiniń, Áýe qorǵanysy kúshteri Áskerı ınstıtýtynyń ushqyshtar quramynan, barlyǵy 45 adam tartylyp, 28 ushý aýysymy oryndaldy. Onyń ishinde: qarapaıym aýa raıy jaǵdaıynda - 9 ushý aýysymy, kúrdeli metereologııalyq jaǵdaıda - 12 ushý aýysymy, qalypty aýa raıy jaǵdaıynda - 7 ushý aýysymy júzege asyryldy. Jıyn barysynda barlyǵy 1490-nan astam ushý sapary oryndaldy, jalpy ushý ýaqyty 1000 saǵatty qurady.
Qorytyndy synaqtardyń nátıjesi boıynsha «1-shi synypty áskerı ushqysh» sanatyndaǵy - 3 ushqysh, «2-shi synypty áskerı ushqysh sanatyndaǵy - 7 ushqysh, «3-shi synypty áskerı ushqysh» sanatyndaǵy - 4 ushqysh daıyndaldy. Sonymen qatar «2-shi synypty áskerı ushqysh» deńgeıine deıin 5 ushqysh ázirlendi.
Jıynnyń qorytyndysy boıynsha Almatydaǵy áskerı áýejaıda ártúrli tektegi tikushaqtardan ushýlar uıymdastyryldy.
