Qazaqstandyq áskerı qyzmetshiler Rıo-de-Janeıroda ótetin 5-shi álemdik Armııalyq oıyndarǵa qatysady
ASTANA. 8 shilde. QazAqparat - Aǵymdaǵy jylǵy 16-24 shilde aralyǵynda Rıo-de-Janeıro qalasynda áskerı qyzmetshiler arasynda 5-shi álemdik Armııalyq oıyndar ótedi. Bul aqparatty QR Qorǵanys mınıstrliginiń baspasóz qyzmetinen habarlady.
Vedomstvonyń atap ótýinshe, oıyndarǵa Qazaqstan Qarýly Kúshteriniń 52 sportshydan turatyn qurama komandasy qatysyp, sporttyń 7 túrinen, atap aıtqanda basketbol, boks, dzıýdo, jeńil atletıka, parashıýt sporty, taekvondo, trıatlonnan óner kórsetedi.
Bul dodadaǵa álemniń 108 eli sporttyń 21 túri boıynsha óz komandalaryn úkilep qosqaly otyr. Mamandardyń boljaýynsha, shamamen 7 myńnan astam sportshy qatysatyn bul saıys kólemi jaǵynan áskerı oıyndar tarıhyndaǵy eń aýqymdysy bolmaq.
Qazirgi tańda Armııalyq sporttyń búkilálemdik keńesin (CISM) álemniń 133 eli Qarýly Kúshteriniń delegatsııasy quraıdy. Bul sport uıymy Halyqaralyq Olımpıadalyq komıtet pen Stýdenttik sport odaǵynan keıingi keshendi sporttyq jarystar ótkizetin birden-bir uıym bolyp tabylady.
CISM jyl saıyn áskerıler arasynda sporttyń ár túrinen jıyrmadan astam álem chempıonattaryn ótkizip turady. Oǵan ár tórt jyl saıyn ótkiziletin Búkilálemdik jazǵy jáne qysqy armııalyq oıyndardy qosyńyz.
1-shi jazǵy Búkilálemdik Armııalyq oıyndar 1995 jylǵy qyrkúıek aıynda Rımde ótkizildi. Bul baıraqty doda ekinshi dúnıejúzilik soǵystyń aıaqtalǵanyna 50 jyl tolýyna arnaldy. Osy saıysta álemniń 93 elinen qatysqan komandalar sporttyń 17 túrinen óner kórsetti. 103 adamnan turatyn Qazaqstan Qarýly Kúshteriniń qurama komandasy sporttyń 12 túrinen jazǵy oıyndarǵa qatysqan bolatyn. Bizdiń sportshylar sol joly 1 altyn, 3 qola medaldi ıelengen edi. Jalpykomandalyq esep boıynsha 83 eldiń arasynan 18 oryn aldy.
2010 jyly SISM chempıonatynda Qazaqstan Qarýly Kúshteriniń komandasy basketboldan VII, erkin kúresten jalpykomandalyq esep boıynsha V oryn aldy. Bokstan byltyr ótken Álem chempıonatynda bizdiń jigitter komandalyq I oryndy enshilep, barlyǵy 9 medaldi qanjyǵaǵa baılaǵan bolatyn. Onyń - ekeýi altyn, úsheýi kúmis, tórteýi qola.
Brazılııada ótetin 5-búkilálemdik Armııa oıyndaryna qatysatyn Qazaqstan Qarýly Kúshteri quramasynda elimizge tanymal sportshylar óner kórsetedi.
Armııalyq sportshylardyń birqatary 2012 jyly Londonda ótetin Olımpıadalyq oıyndarǵa qazirdiń ózinde joldama alyp úlgirdi.
