Qazaqstandyq áskerı qyzmetshiler-parashıýtshiler Azııa jáne Okeanııa chempıonatynyń rekordyn ornatty (FOTO)
Bul týraly QR QM baspasóz qyzmeti habarlady.
Qytaı Halyq Respýblıkasynyń Taııýan qalasynda áskerı qyzmetshiler parashıýttik sporttan Qazaqstan Respýblıkasynyń ulttyq qurama komandasynyń quramynda óner kórsetti. Parashıýttik komandanyń bastyǵy maıor Leonıd Dýdkınniń basshylyq etýimen Áýe qorǵanysy kúshteriniń sporttyq parashıýttik komandasy bul jarystarda Qazaqstan Respýblıkasyn joǵary deńgeıde kórsetti.
Saıysqa álemniń 14 elinen jınalǵan komandalar qatysty. Eki dodada jarysqa tústi. Ol: klassıkalyq parashıýtızm - jeke synaqta jerge qoný dáldigine arnalǵan sekirýler jáne jeke parashıýttik akrobatıka, sondaı-aq kúmbezdi parashıýttik akrobatıka (4 parashıýtshiniń rotatsııasy).
Qytaı men Azııa jáne Okeanııa ashyq ultaralyq chempıonatynyń chempıondary ataǵyn kúmbezdi parashıýttik akrobatıka komandasy ıemdendi. Áskerı qyzmetshi kapıtan Azamat Ábdiraıymov, praporşık Arsenıı Tarabaev, starshına Andreı Tomılın, Denıs Novıtskıı jáne QR QK qyzmetkeri Aleksandr Terentev birinshi oryndy qanjyǵasyna baılap, IMEKS synaǵynda Qytaıdyń ashyq ultaralyq chempıonatynyń chempıondary atandy. Komanda bes altyn medalmen, on kúmis medal jáne eki kýbokpen marapattaldy.
Atalǵan chempıonatta QR QK Áýe qorǵanysy kúshteri Parashıýttik daıyndyq ortalyǵynyń jeke quramy kúmbezdi parashıýttik akrobatıka (4 parashıýtshiniń rotatsııasy) boıynsha Azııa jáne Okeanııa chempıonatynyń rekordyn ornatty. Qazaqstandyq parashıýtshiler «Katarı» komandasymen jıyrma rotatsııa oryndady. Osy fıgýrany oryndaý kezinde parashıýtshiler biriniń artynda biri ornalasyp, kezekpen almasyp, oryndarymen aýysady. Rotatsııadaǵy jarystar kezinde 4 parashıýtshi men áýe operatorynan quralǵan komandalar qatysady. Berilgen ýaqyt sheńberinde jarystyń barlyq aınalymy aıaqtalǵannan keıin rotatsııanyń barynsha kóp sanyn oryndaǵan komanda jeńiske jetedi.