Qazaqstandyq áskerı qyzmetshiler álemdegi eń myqtylardyń biri - Bas qolbasshy

ALMATY. QazAqparat – QR Qarýly Kúshteri Qurlyq áskerleriniń Bas qolbasshysy, general-maıor Marat Qusaıynov Qazaqstan aýmaǵynda ótken 2019 jylǵy 5-shi Halyqaralyq Armııa oıyndaryn qorytyndylady, dep habarlaıdy QazAqparat tilshisi.

«Biz Qazaqstan Respýblıkasynyń aýmaǵynda ótken tórtinshi áskerı oıyndardy aıaqtadyq. Bir apta ishinde qatysqan bólimsheler ózderiniń qabiletterin, sheberlikterin, jeńiske degen umtylystaryn kórsetti. Jalpy, el aýmaǵynda 4 jyl qatarynan ótkizilip kele jatqan bul jarystar, eń aldymen, Qazaqstan jáne basqa memleketterdiń áskerı qyzmetshileriniń jaýyngerlik qabiletteri men daǵdylaryn arttyrýǵa kómektesedi. Bul armııa oıyndary jeke quramdy damytýǵa, áskerı ádisterdi jetildirýge, jaýyngerlik operatsııalardy júrgizýge, is-qımyl taktıkasy, qarýlaný kezindegi is-áreketter, sondaı-aq logıkalyq oılaý, tótenshe jaǵdaılar kezinde jedel sheshim qabyldaý turǵysynan áskerı sheberlik protsesterin damytýǵa yqpal etedi. Qazaqstan 32 saıystyń 16-na qatysady. Búgingi tańda olardyń 13-i aıaqtaldy. Bizde 3 birinshi, 2 ekinshi, 7 úshinshi oryn bar. Bizdiń áskerı qyzmetshiler taǵy úsh saıysqa qatysyp jatyr. Olar aldaǵy úsh kúnde aıaqtalady. 17 tamyzda komandalyq nátıjeler shyǵarylady. Qazaqstan qatysyp jatqan 39 eldiń ishinde jeńimpazdar qatarynda bolady dep senemin. Bizdiń áskerı qyzmetshiler álemdegi eń úzdikterdiń qataryna jatady, biz buny maqtan tutamyz jáne bolashaqta qazaqstandyq ásker budan da joǵary nátıjelerge qol jetkizetinine senimdimiz. Biz barymyzdy salamyz»,- dedi Marat Qusaınov.

Búgin Jambyl oblysyndaǵy «Otar» 40-shy áskerı bazasynda Halyqaralyq Armııa oıyndary aıaqtaldy. Úsh saıysta da qazaqstandyqtar úzdik atandy.