Qazaqstandyq áskerı qyzmetshi parashıýtpen sekirýden rekord jasady

ASTANA. QazAqparat - Praporşık Sergeı Basalov Qarýly Kúshterdegi 22 jyl qyzmet ishinde parashıýtpen myńnan astam ret sekirgen. Búgingi tańda bul Qazaqstan Aeroutqyr áskerleri áskerı qyzmetshileri arasyndaǵy rekord, dep habarlaıdy QR Qorǵanys mınıstrliginiń baspasóz qyzmeti.

Sergeı Basalov - tájirıbeli parashıýtshi. Ol táýelsiz Qazaqstan armııasynyń negizi qalanǵannan beri 15 jyl 32363 áskerı bólimi aspaptar zerthanasynyń bastyǵy bolyp qyzmet etti. Osy ýaqyt ishinde ol parashıýttik daıarlyq nusqaýshysy bola júrip parashıýt júıeleriniń 12 úlgisin, paraplan men deltaplannyń 4 úlgisin meńgerdi, 200-den astam adamǵa úıretti.

Aeroutqyr áskerleri parashıýttik komandasynyń áskerı qyzmetshileri sheberlik sanattary boıynsha bylaısha bólinedi: parashıýtshi (10 sekirýge deıin), úzdik parashıýtshi (20-dan kóp sekirý), parashıýtshi-nusqaýshy. Desantshy jylyna 3500 metrge deıingi túrli bıiktikterden 4-5 sekiredi.

«Qansha ret sekirseń de jańasy qorqynysh týdyrady, bul qalypty jaǵdaı. Sondyqtan da barlyq kezde parashıýtshilerdiń emotsıonaldyq jaǵdaıy tekserilip otyrady. Áskerı qyzmetshiler arnaıy psıhologııalyq testileýden ótedi.

Sonymen qatar, sekirýdi oryndaý erejesinen emtıhan men synaq tapsyrady», - dep túsindiredi Sergeı Basalov.

Sekirýdiń maqsaty - qoıylǵan mindetti oryndaý. Udaıy ótkizilip turatyn jattyǵýlarda, sekirý aldyndaǵy jerdegi daıarlyq jónindegi sabaqtarda desantshylar barlyq is-qımyldardyń algorıtmin avtomatty túrde oryndaý deńgeıine jetkizýge tyrysady. Sekirýdiń tolyq qarý-jaraqpen jáne jer jaǵdaıyn talǵamaı táýliktiń kez kelgen mezgilinde jasalýy atqarylar mindetti qıyndata túsedi.