Qazaqstandyq áskerı dárigerler Lıvanda zardap shekkenderdi emdeýde
QR Qorǵanys mınıstrliginiń málimetine sáıkes, dárigerler Beırýt, Boýar, Mashgar jáne Saıda qalalarynyń medıtsınalyq mekemelerinde naýqastarǵa kómek kórsetýde.
Alǵashqy jumys kúninen bastap Qazaqstannyń áskerı dárigerleri Lıvannyń júzdegen azamatyna medıtsınalyq kómek kórsetken. Olar Lıvan dárigerlerimen birge áskerı gospıtal jáne mýnıtsıpaldyq aýrýhanalardyń bazasynda jumys atqarýda.
Mınıstrlik aqparatynsha, naýqastardyń arasynda ammıak selıtrasynyń detonatsııasynan bolǵan jarylys tolqynynan zardap shekkender bar.
«Qazaqstandyq dárigerler hırýrgııalyq, travmatologııalyq jáne terapevtik patsıentterdi emdeýge jumyldyryldy. Bizdiń dárigerler reanımatsııa jáne anestezıologııa bólimsheleriniń jumysyna, endoprotezdeý sııaqty joǵary tehnologııalyq qyzmetterdi qosa alǵanda, operatsııalar júrgizýge belsendi qatysady. Sonymen qatar, áskerı dárigerler ambýlatorııalyq naýqastarǵa kómek kórsetý jáne qabyldaý boıynsha medıtsınalyq pýnktiń jumysyn uıymdastyrýda», - delingen QR Qorǵanys mınıstrliginiń málimetinde.
Qazaqstandyq dárigerlerdiń jumysy eldegi epıdemııalyq jaǵdaıdy eskere kele, qatań sanıtarlyq-gıgıenalyq talaptardy saqtaı otyryp uıymdastyrylǵan.
«Men Lıvannyń ońtústigindegi Beırýtta turamyn. Osy qıyn-qystaý kezeńde Qazaqstan basshylyǵyna jáne áskerı dárigerlerge meniń halqyma jáne balalaryma kómek kórsetkeni úshin alǵysymdy bildirgim keledi. Lıvanǵa qosh keldińiz!»,- dedi naýqastardyń biri Fadı Ehrı.
Esterińizge sala keteıik, qazirgi ýaqytta Lıvanda arnaıy maqsattaǵy qazaqstandyq áskerı-medıtsınalyq jasaq jumys jasaýda.
