Qazaqstandyq áskerı boksshy halyqaralyq týrnırden altyn júlde aldy
ASTANA. QazAqparat - Serbııada ótken «Ult kýbogi» halyqaralyq týrnırinde jerlesimiz Rımma Volosenko altyn júldege ıe boldy, dep habarlaıdy QazAqparat QR Qorǵanys mınıstrliginiń sport komıtetine silteme jasap.
«Serbııanyń Sombora qalasynda bokstan «Ult kýbogi» halyqaralyq týrnıri óz máresine jetti. Onda sport komıteti - Armııa ortalyq sport klýbynyń sportshysy Rımma Volosenko altyn medal enshiledi. Ol jekpe-jekte 60 kelige deıingi salmaq dárejesinde 5:0 esebimen Horvatııa sportshysy Sarý Beramdy jeńdi», - dep jazylǵan komıtettiń Feısbýk paraqshasynda.
Odan bólek, otandasymyzǵa saıys qorytyndysy boıynsha «Úzdik jaýynger» ataǵy berildi.
Osymen 8-shi ret uıymdastyrylǵan ult kýbogine 21 elden, ıaǵnı, Bolgarııa, Bosnııa jáne Gertsegovına, Majarstan, Germanııa, Grekııa, Qytaı, Latvııa, Lıtva, Norvegııa, Polsha, Rýmynııa, Reseı, Slovenııa, Somalı, Serbııa, Ózbekstan, Ýkraına, Frantsııa, Horvatııa, Chehııa, sondaı-aq Chernogorııadan 170-ten asa sportshy qatysty.
Sondaı-aq, habarlamada málim etilgendeı, Qazaqstannyń áıelder quramasy jalpy komandalyq esepte birinshi oryndy ıelenip, týrnırdiń sýper kýbogin jeńip aldy.
Aıtýly básekede ІІ orynǵa Reseıdiń sportshylary taban tirese, tıisinshe ІІІ oryn Serbııa komandasyna buıyrdy.
«8 jyldyq tarıhy bar týrnırde qazaqstandyq qyz-kelinshekterdiń bul 4-shi jeńisi, budan buryn áıelder quramasy 2012, 2015 jáne 2017 jyldary úzdik dep tanyldy», - delingen habarlamada.
