Qazaqstandyq áskerı-áıelder BUU mıssııasyna áskerı sarapshy retinde jiberilýi múmkin

ASTANA. QazAqparat - Qazaqstandyq názikjandy áskerıler BUU-nyń bitimgershilik mıssııasynyń qatarynda qyzmet etýi múmkin. Bul týraly búgin Astanada «Áıelder, beıbitshilik jáne qaýipsizdik máseleleri jónindegi BUU Qaýipsizdik keńesiniń qarary" atty taqyrypta ótken dóńgelek ústelde Qorǵanys mınıstrligi Bas shtaby basshysynyń orynbasary Muhamedjan Talasov málim etti.

Bas shtab ókiliniń aıtýyna qaraǵanda, qazirgi tańda qazaqstandyq bitimgershilik brıgadada 80-ge tarta áıel qyzmetkerler áskerı qyzmetin ótkizýde. «Aldaǵy ýaqytta BUU bitimgershilik mıssııasyna áskerı-áıelderdi daıyndaý jáne baǵyttaý jónindegi máselelerdi qarastyrý josparlanady. Qorǵanys mınıstrligi bitimgershilik qyzmetti beıbitshilik pen qaýipsizdikti qoldaý baǵytyndaǵy halyqaralyq mindettemelerdi oryndaý bóligindegi memlekettik qorǵanys saıasatynyń mańyzdy quramdasy retinde qarastyrady. Sonyń ishinde BUU qaýipsizdik keńesi qararyna sáıkes atqarylatyn sharalar aıasynda bitimgershilik qyzmetke qatysý mańyzdy», - dedi M. Talasov.

Onyń sózine qaraǵanda, búgingi kúni Qazaqstannyń qarýly kúshteri BUU-nyń Batys Saharadaǵy jáne Kot-d-Ivýardaǵy mıssııalaryna áskerı baıqaýshy retinde belsendi túrde qatysýda. «BUU mıssııasyna qatysý úshin 20-dan astam ofıtserler daıarlyqtan ótti, olardyń ishinde 5-eýi batys Saharada al ekeýi Kot-d-Ivýarda BUU áskerı baıqaýshylary retinde qyzmet etýde. Buǵan deıin úsh ofıtser ózderiniń mıssııasyn tabysty aıaqtap, Batys Saharadan elimizge oralǵan bolatyn», - dedi M. Talasov.

Eske sala keteıik, BUU Qaýipsizdik Keńesiniń 2000 jyldyń 31 qazanynda biraýyzdan qabyldanǵan qarar áıelder, beıbitshilik jáne qaýipsizdik máseleleri jónindegi tuńǵysh qujat bolyp tabylady. Bul qujat BUU múshe-memleketteriniń barlyǵy úshin atqarylýy mindetti.