Qazaqstandyq arý semserlesýden álem chempıonatynyń qola júldegeri atandy
ASTANA. QazAqparat - Italııanyń Verona qalasynda semserlesýden jasóspirimder men kadetter arasynda ótip jatqan álem chempıonatynda otandasymyz Tamıla Mýrıdova qola júldeger atandy, dep habarlaıdy QazAqparat.
QR Ulttyq olımpıada komıtetiniń baspasóz qyzmeti taratqan málimetke súıensek, Mýrıdova osy jeńisiniń nátıjesinde Býenos-Aıres qalasynda ótetin jastar arasyndaǵy Olımpıada oıyndaryna joldamany qosa enshilegen.
Ol jarystan keıin tilshilerge bergen suhbatynda: «Jacóspirimder arasyndaǵy álem chempıonatyna uzaq ýaqyt boıy daıyndaldym. Sebebi, bul - jastar arasyndaǵy Olımpıada oıyndary aldyndaǵy eń basty týrnırlerdiń biri. Maǵan tórt jylda bir ótetin dúbirli dodaǵa joldama alý mańyzdy boldy. Maqsatyma jettim. Jalpy bul medal Qazaqstan tarıhynda áıelder arasyndaǵy semserlesýden álem chempıonatynyń tuńǵysh júldesi eken», - dep aǵynan jaryldy.
Illıýstratsııalyq foto
