Qazaqstandyq arý «Miss Asia Pacific 2018» baıqaýynda jeńimpaz atandy
ASTANA. QazAqparat - «Miss Asia Pacific International 2018» halyqaralyq sulýlyq baıqaýyna qatysyp jatqan Dıdar Atmadja qosymsha konkýrstardyń birinde jeńimpaz boldy, dep habarlaıdy QazAqparat tilshisi.
Almatylyq sulý Dıdar Atmadja qazirgi tańda Fılıppınde ótip jatqan Miss Asia Pacific 2018 halyqaralyq konkýrsynda óner kórsetýde. Oǵan 50 memlekettiń - AQSh, Latyn Amerıkasy, Afrıka, Eýropa, Tynyq muhıty jáne Azııa elderiniń arýlary qatysýda. 14 qyrkúıekten beri olar kún saıyn túrli nomınatsııalar úshin daıyndyq jumystaryn júrgizýde. Aspazdyq konkýrsy, shomylatyn kıim kıip, tiri jylandarmen jáne leopardtarmen fotosessııa, ulttyq kıimder defılesi artta qaldy.
25 qyrkúıekte daryndylar konkýrsy ótip, onda qazaqstandyq arý úzdik dep tanyldy.
«Men Miss Asia Pacific International 2018 daryndylar konkýsynda jeńimpaz atanǵanyma sene alar emespin! Meniń armanym oryndaldy, bul álem chempıonatyndaǵy jeńispen birdeı. Bal bıin bıledim. Óte baqyttymyn! Maǵan qoldaý kórsetip, senim artqandaryńyzǵa rahmet», - dep jazdy Dıdar Atmadja Instagram paraqshasynda.
Konkýrs jalǵasýda. Endi 28 qyrkúıekte keshki kóılekter defılesi jáne 4 qazanda grand-fınal ótedi. Onda basty tıtýl men táj ıesi belgili bolady. Budan bólek, baıqaýdyń saıtynda kórermender kózaıymy nomınatsııasy úshin daýys berý júrip jatyr. Dıdar úshin myna jerde daýys berýge bolady.
