Qazaqstandyq arý Miss Asia Global tıtýlyn jeńip aldy
KOChIN. QazAqparat - «Miss Asia Global Qazaqstan 2018» óńirlik konkýrsynyń jeńimpazy Ásem Esengeldıeva «Miss Asia 2018» halyqaralyq sulýlyq baıqaýynda Miss Asia Global tıtýlyn ıelendi, dep habarlaıdy QazAqparat.
Konkýrs Úndistannyń Kochın qalasynda 2-10 qarashada ótti. Bul Ásemniń halyqaralyq deńgeıdegi alǵashqy jeńisi. Sondaı-aq, jerlesimiz «Eń ádemi shash» jeke nomınatsııasynda jeńimpaz atandy.
Bıyl «Miss Asia» táji úshin álemniń 25 eliniń ókilderi baq synap jatyr.
«Miss Asia» álemdegi tanymal halyqaralyq konkýrstardyń biri sanalady. Ol 1968 jyldan beri ótkizilip keledi.
Ásem halyqaralyq konkýrstyń tıtýlynan bólek uıymdastyrýshylardan aqshalaı sertıfıkat aldy. Miss Asia Global tıtýlynyń ıegeri shuǵyl operatsııaǵa muqtaj jergilikti balalarǵa belgili bir somany berýdi jón dep tapqan.
Ásem Almatyda oqıdy. Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń úshinshi kýrsynyń stýdenti. Ol Velada halyqaralyq modeldik agenttiginiń quramynda. Túrli jyldary aýdandyq jáne oblystyq sán baıqaýlaryna qatysqan.
«TMD arýy» halyqaralyq sulýlyq baıqaýynda 16 eldiń ishinde «TMD 1-shi vıtse-mıss 2018» tıtýlyn ıelendi.
Ásemniń ózi Victoria's Secret quramyna kirýdi armandaıtynyn aıtty. Ol bos ýaqytynda sadaq atýmen aınalysady, án shyrqaýǵa áýes jáne kóp oqıdy. Kóptegen ıvent jobalarǵa qatysady.
