Qazaqstandyq artrologtar býyn aýrýy - osteortrozdy hırýrgııalyq aralasýsyz emdeý ádisterin ıgere bastady

Baspasóz máslıhatyna erteń, sáýirdiń 29-y kúni Astanadaǵy Travmatologııa jáne ortopedııa ǵylymı-zertteý ınstıtýtynda (TOǴZI) ótetin «Qazaqstandaǵy artrologııanyń ózekti máseleleri jáne ony sheshý joldary» taqyrybynda ótetin halyqaralyq ǵylymı-tájirıbelik konferentsııaǵa qatysý úshin kelgen, álemdegi úzdik artrolog mamandar qatysty. Atap aıtqanda, De lıa týr Gospıtali tize býyny bóliminiń meńgerýshisi Matıs Býrk pen Máskeý qalalyq revmatologııa ortalyǵynyń meńgerýshisi Evgenııa Shmıdt bar.

Konferentsııanyń basty taqyryby - osteortroz aýrýyn emdeýde qoldanylatyn ozyq tájirıbeler máselesi bolmaq. Osteoartroz - álemde júrek-qan tamyry aýrýlarynan keıin ekinshi orynda tur. Býyn aýrýlary Qazaqstanda da óte kúrdeli turǵan másele. Sebebi 60-tan asqan qarttardyń 80 paıyzǵa jýyǵy osy aýrýǵa shaldyqqan. Osteoartrozda - býynǵa jalǵanǵan eki súıektiń arasyndaǵy kemik maıy azaıyp, súıekter bir-birine qajalyp, mújile bastaıdy.

Qazaqstanda aýrýdyń bul túrin konservatıvtik jáne hırýrgııalyq ádistermen emdeıdi. Osteoartroz hırýrgııalyq aralasýǵa deıin asqynǵan jaǵdaıda, naýqasqa býyn almastyrý, ıaǵnı endoprotezdeý jasalady.

TOǴZI dırektorynyń orynbasary Qýanysh Ospanovtyń aıtýynsha, atalmysh ınstıtýt jylyna 600-den astam endoprotezdeý operatsııasyn jasaıdy. Kezekke jyl saıyn 1000 astam adam turady.

Búgingi kúni Qazaqstanda bul ádis birqatar oblys ortalyqtarynda keńinen ıgerile bastaǵanymen, M.Býrktyń aıtýynsha, bul artta qalǵan úrdis jáne qazirgi ǵylym bul aýrýdy hırýrgııalyq aralasýǵa deıin jetkizbeıdi. Qazir kóptegen elder «Ostenıl» preparatyn qoldanyp otyr. Osy preparat erteń Astanadaǵy konferentsııada tanystyrylyp, onyń artyqshylyǵyn dáleldeý maqsatynda júrgizilgen zertteý jumystarynyń nátıjeleri usynylatyn bolady.

«Ostenıl» endoprotezdeý ádisiniń ornyna qoldanylady. Preparat býynǵa egý arqyly engiziledi jáne ol súıekterdi bir jylǵa deıin maılap, qajalýdan saqtaıdy. Aýrýdyń alǵashqy satysynda qoldanylǵan jaǵdaıda osteortrozdy toqtatýǵa múmkindik beredi.

Baspasóz máslıhatynda málim bolǵandaı, «Ostenıl» Qazaqstanda da qoldanyla bastaǵan jáne ol Densaýlyq saqtaý mınıstrliginiń ómirlik qajetti dári-dármekterdiń tizimine engizildi. «Álemdik ınnovatsııanyń bul túrin Qazaqstanǵa engizdik. Buǵan deıin biz osteoartrozdy emdeýde aýyrsynýdy basatyn dári-dármekterdi qoldanylyp keldik. Al Ostenıl aýrýdy toqtatýǵa múmkindik beredi», - dep atap ótti Almaty qalasyndaǵy Býyn aýrýlary medıtsınalyq ortalyǵynyń dırektory Ǵalymjan Toǵyzbaev.