Qazaqstandyq ártister Eýropanyń 5 áıgili sahnasynda óner kórsetedi
Kári qurlyqqa Qazaqstannyń atynan «Astana Musical» teatrynyń ártisteri men Respýblıkalyq akademııalyq nemis drama teatry attanady. «Uly Dalanyń teatry» atty aýqymdy shara Memleket basshysynyń «Bolashaqqa baǵdar: Rýhanı jańǵyrý» baǵdarlamalyq maqalasy jáne «Jahandyq álemdegi qazirgi qazaqstandyq mádenıet» uranymen 2017 jyldyń jeltoqsan aıynda ótkizilmek.
«Búginge deıin osynaý baǵdarlamanyń tusaýkeseri Parıj qalasynda ıÝNESKO-nyń Bas Assambleıasy kezinde bolyp ótken edi. Osyndaı mazmundaǵy tanystyrylym Túrkııany da tamsandyrǵan. Al jaqynda Mádenıet jáne sport mınıstri úlken delegatsııamen Gollıvýdta bolyp, sonda bizdiń fılmder kórsetildi», - deıdi Mádenıet jáne sport vıtse-mınıstri Aqtoty Raıymqulova OKQ-da ótken baspasóz máslıhaty barysynda.
Qazaqstandyq ártisterdiń týrynyń aýqymy Berlın, Parıj, Vena, Brıýssel jáne Máskeý qalalaryn qamtymaq. Dál osy qalalarda «Astana Musical» teatry «Qyz Jibek» etnofolklorly mıýzıklin kórsetedi. Al nemis teatry Muhtar Áýezovtyń «Qaragóz» klassıkalyq týyndysyn nemis tilinde kórermenge usynady.
