Qazaqstandyq ánshiler Elbasynyń tez saýyǵýyn tiledi
Osy oraıda Qazaqstannyń halyq ártisi Bıbigúl Tólegenova vıdeojoldaýynda Tuńǵysh Prezıdentke aýrýdy jeńip shyǵýdy tiledi.
«Qurmetti Nursultan Ábishuly! Sizdiń koronavırýs juqtyrǵanyńyzdy estigennen keıin ýaıymdap otyrmyz. Siz osylaı ashyq júrgenińizde «nege oshaýlanbaıdy, nege bir top adammen otyrady?» dep oılaýshy edim. Sizge tileıtinim: osy aýrýdy jeńip shyǵyńyz. Nureke, tez jazylyńyz. Denińiz saý, ómirińiz uzaq bolsyn! Mundaı aýrý eshkimge jaqyn kelmesin!» - dep tilegin bildirdi qazaqtyń bulbul ánshisi.
Ánshi Álisher Karımov te Elbasynyń koronavırýstan tezirek jazylyp ketýine tilekshi ekendigin jetkizdi.
«Qurmetti Nursultan Ábishuly! Sizdi óte jaqsy kóremiz. Tezirek saýyǵyp, uzaq ǵumyr súrýińizge tilekshimin», - dep jazdy ánshi Instagram paraqshasynda.
Sonymen qatar ánshi Kental da osynaý vırýspen kúresip jatqan barlyǵynyń tezirek saýyǵyp ketýin tiledi.
«Aýrý seniń áleýmettik mártebeńe, qoǵamdaǵy ornyń men tanymaldyǵyńa qaramaıdy. Osynaý zulym vırýs aldynda barlyǵymyz da birdeımiz. Elbasynyń jáne osynaý vırýspen kúres jatqan barlyǵynyń tezirek saýyǵyp ketýine tileımin. Alla shıpasyn bersin! Tez jazylyp ketińizder, Aman bol, halqym!», - dep jazdy ánshi Instagram paraqshasynda.
Munymen qosa ánshi ári prodıýser Rano Ýmarova da Tuńǵysh Prezıdenttiń, sondaı-aq osy indetti juqtyrǵan barsha qazaqstandyqtardyń tez saýyǵýyna tilek bildirdi.
«Shyn júrekten Tuńǵysh Prezıdent Nursultan Ábishulynyń tez saýyǵýyn tileımin. Elbasy qaısar ári myqty adam dep bilemin jáne mindetti túrde indetti jeńetinine senemin. Osy oraıda zor densaýlyq pen uzaq ómir tileımin!», - dedi R. Ýmarova.
Aıta keteıik, Elbasynyń baspasóz hatshysy Aıdos Úkibaı Qazaqstannyń Tuńǵysh Prezıdenti – Elbasy Nursultan Nazarbaevtyń Covid-19-ǵa tapsyrǵan synamasy oń nátıje kórsetkenin habarlaǵan edi.
Soǵan qaramastan Nursultan Ábishuly ózin-ózi oqshaýlap, qashyqtan jumys isteýdi jalǵastyrýda.
Osy ýaqytqa deıin elimizdiń barlyq óńirlerinen jurtshylyq Elbasynyń saýlyǵyn tilep, izgi nıetterin bildirýde. Munan bólek, Reseı Prezıdenti Vladımır Pýtın,
Túrkııa Respýblıkasynyń Prezıdenti Rejep Taııp Erdoǵan,
Úndistannyń Premer-Mınıstri Narendra Modı,
Ózbekstan Prezıdenti Shavkat Mırzıeev Qazaqstannyń Tuńǵysh Prezıdenti – Elbasy Nursultan Nazarbaevqa myqty densaýlyq pen tezirek saýyǵyp ketýin tilep jedelhat joldady.
