Qazaqstandyq ánshi «TURKVIZYON-2014» baıqaýyn ashady

ASTANA. QazAqparat - Qazaqstandyq ánshi Janar Doǵalova 19-21 qarashada Qazanda ótetin «Turkvizyon-2014» baıqaýyn ashady. Bul týraly Instagram-daǵy óz paraqshasynda belgili prodıýsser Dınara Adam habarlady.

«Janar Doǵalova jartylaı fınalǵa jerebeden bir sanyn sýyrdy. Alǵashqy bolyp sahnaǵa shyǵady. Munda 25 elden qatysýshylar bar. Birinshi shyǵatynyn jaqsy yrymǵa balaımyn», - dep jazdy D. Adam.

Budan buryn habarlanǵandaı, Janar Doǵalova qazannyń aıaǵynda ótken ulttyq baıqaý fınalynda jeńiske jetken. Halyqaralyq vokal baıqaýynda 16 elden oryndaýshy baq synasýda.

«Turkvizyon» túrik álemindegi «Eýrovıdenıeniń» balamasy ispettes. Baıqaý aýdıtorııasy 300 mln. astam adamdy quraıdy.

«Turkvizyon» alǵashqy baıqaýy ótken jyly túriktiń Eskishahar qalasynda ótken. Oǵan 24 el men óńirlerdiń ókilderi qatysqan. Ol joly Qazaqstan atynan shyqqan Rin'Go toby fınalda 9-shy oryndy ıelengen bolatyn.

Janar Doǵalova «Astana juldyzy» ulttyq syılyǵynyń nusqasy boıynsha 2014 jylǵy úzdik ánshi atanǵanyn aıta ketken jón.