Qazaqstandyq ánshi Marııa Mýdrıak Vallonııa Koroldik teatrynda óner kórsetedi
BRıÝSSELЬ. QazAqparat - Belgili qazaqstandyq opera ánshisi Marııa Mýdrıak Leje qalasyndaǵy Vallonııa Koroldik teatrda óner kórsetedi. Bul týraly belgııalyq teatrdyń resmı saıtynan habarlandy.
Belgili operalyq ánshi Rossınıdiń «Jibek saty» (La scala di seta) operasyna qatysýǵa shaqyrtyldy. Qazaqstandyq oryndaýshy ıtalııalyq kompozıtordyń shyǵarmasynda basty róldi - Djýlııa rólin oınamaq.
Kontsert 2016 jyldyń 11 naýryzynan 19 naýryzǵa deıin ótedi. Ony belgili amerıkalyq dırıjer Krıstofer Franklın basqarady.
Atap óteıik, Marııa Mýdrıak 12 jasynda Mılan qalasynyń «Scuola Musicale di Milano» Joǵary mýzyka akademııasynda oqýy úshin Memlekettik Prezıdenttik «Bolashaq» stıpendııasyna ıe boldy. 2008 jyly 14 jasynda Djýzeppe Verdı atyndaǵy Memlekettik Konservatorııaǵa oqýǵa tústi. Qazir ol joǵary bilimi bar álemdegi eń jas operalyq ánshi.
