Qazaqstandyq ánshi qyz «Slavıan bazary-2014» baıqaýynyń fınalyna shyqty
ASTANA. QazAqparat - Belarýs eliniń Vıtebsk qalasynda ótip jatqan «Slavıan bazary» HHІІІ halyqaralyq óner festıvaliniń alǵashqy konkýrstyq kúniniń nátıjeleri boıynsha qazaqstandyq ánshi qyz Marhaba Sábıeva fınalǵa shyqty.
belta.by habarlaǵandaı, fınalǵa shyǵý úshin 21 ánshi ózara básekege túsken, solardyń ishinen 15 ónerpaz iriktelip alyndy. Endi aqtyq saıysta Artýr Mıhaılov (Belarýs), Monıka Karagenova (Bolgarııa), Dıana Golbı (Izraıl), Marhaba Sábıeva (Qazaqstan), Sharlot (Kýba), Emıls Baltserıs (Latvııa), Mılda (Lıtva), Dımıtar Andovskı (Makedonııa), Rodrıgo de la Kadena (Meksıka), Vıtalıe Negrýtsa (Moldova), Zlat (Reseı), Aleksa Perovıch (Serbııa), Veronıka Dorosh (Ýkraına), Dıno (Horvatııa), Tomas Kolk (Estonııa) óner kórsetedi.
Aıta keteıik, baıqaýdyń ádilqazylar quramynda áıgili qazaqstandyq ánshi Tolqyn Zabırova da bar. Al qazylar alqasynyń tóraǵasy - Reseıdiń eńbek sińirgen óner qaıratkeri Kım Breıtbýrg.
Konkýrs jeńimpazy arnaıy «Lıra» syılyǵyn, Gran-prı dıplomy men $20 myń kóleminde aqshalaı syılyq alady. Atalmysh konkýrstyń baǵdarlamasy aıasyndaǵy balalar baıqaýynda qyzylordalyq 11 jasara ónerpaz Nurjan Jumaǵalı da kópshilik aldynda óz ónerin pash etken bolatyn. Ol djaz stılinde qazaqtyń ulttyq aspaby - dombyra týraly ańyzdy oryndap bergen edi, delingen festıvaldiń resmı saıtynda.
