Qazaqstandyq ánshi Djonatan Dassenmen birge án shyrqaıdy
ASTANA. QazAqparat - Otandyq estradadaǵy jas ánshi Merýert Músirálı ataqty Djo Dassenniń uly, frantsýzdyq ánshi Djonatan Dassenmen birge án shyrqaıdy, dep jazady «Ekspress-K».
«Men qatty tolqyp júrmin. Kez kelgen ándi emotsııamen, júrekpen oryndaý kerek. Al ándi dýet bolyp shyrqaǵanda bir-birine degen senim pen túsinistik qalyptastyryp, úılesim ornata bilý mańyzdy. Osy oraıda, bizdiń alǵashqy dýetimiz tyńdarmandardyń kóńilinen shyǵady dep oılaımyn», - deıdi Merýert.
Aıta keterligi, taıaýda Djonatan Dassen Almatydaǵy «Shymbulaq» taý shańǵy kýrortynda jeke kontsertin bergen bolatyn. Kesh barysynda ataqty mýzykant ári kompozıtor Djo Dassenniń uly Djonatan almatylyq kórermenderge buryn-sońdy ádemi áıelderdi eshqaı jerden kórmegenin aıtyp, aǵynan jarylǵan-dy. Sondaı-aq ánshi buǵan deıin Qazaqstan týraly eshteńe bilmegenin, endi Qazaq elin óziniń gastroldik kestesine qosatynyn aıtty.
Endi belgili ánshiniń Qazaqstanǵa kelýiniń taǵy bir sebebi bar. Qazir ol aqyn Karına Sársenovamen jumys istep jatyr. Aqynnyń sózine jazylǵan ándi Merýert Músirálımen birge oryndaýdy kózdep otyr.
