Qazaqstandyq ánshi Dımash Qudaıbergenov Qytaıda erekshe tanymal bola tústi
ASTANA.QazAqparat - Qytaıdyń Hýnan TV singer2017 án baıqaýyna qatysyp jatqan otandasymyz Dımash Qudaıbergenovtyń Qytaıda tanymaldylyǵy artyp keledi.
Qytaılyq basylymdardyń habarlaýynsha, baıqaýdyń túsirilim jumystary óz máresine jetken. Alaıda jobanyń áli efırge shyqpaǵanyna qaramastan Dımashtyń tanymaldylyǵy kún saıyn artyp kele jatyr. Qazaq ánshiniń ónerine tánti bolǵan jergilikti turǵyndar ıternetten Dımashtyń buǵan deıin oryndaǵan qytaılyq tanymal ánshi Han Hýnnyń «Tań» atty áni men «Daıdaı-aý» ánin joǵary baǵalaǵan.
Buǵan deıin Dımash jobanyń birinshi kezeńinde frantsýzdardyń eń qıyn ániniń biri bolyp tabylatyn áıgili «SOS d'un terrien en détresse» ánin oryndaǵanyn habarlaǵan bolatynbyz. Al qytaılyq saıttardyń habarlaýynsha, Dımash ekinshi kezeńde orystyń joǵary daýysty ánshisi Vitas-tyń Opera2 ánin sátti oryndaǵan.
Vitas erekshe daýysymen Qytaıdy tań qaldyrǵan ánshi. Bul kúnde qytaılyq ánsúıer qaýym Dımashtyń reseılik ánshiden de tanymal bolatynyna senimdi. Al ánshiniń jaqynda ǵana ashqan Sina Weibo (Týıtterdiń balamasy) áleýmettik mıkroblogyna jazylýshylardyń sany 35 myńǵa jetken. Alǵashqy efırden keıin dımashtanýshylardyń sany kúrt kóbeıýi múmkin.
Jobanyń túsirilimi barysynda Dımashqa qytaı tiliniń aıtarlyqtaı qıyndyq keltirgeni belgili. Áıtse de jas ánshi bul qıyndyqtardyń barlyǵyn eńserip keledi.
Alǵashqy efır búgin Hýnan telearnasynan kórsetiledi.
