Qazaqstandyq ánshi álemdik juldyz Beıonseniń ánderin qaıta oryndady
ALMATY. QazAqparat - «X Factor Qazaqstan» jobasynyń jeńimpazy Darııa Ǵabdýl @dariya_gabdull «Arystan Patsha»/«Korol Lev» kınotýyndysynda Beıonseniń daýysyn saldy, dep habarlaıdy QazAqparat tilshisi.
Anımatsııalyq klassıkanyń kınonusqasy Qazaqstanda qazaq tilinde de shyqty. Fılmge saýndtrekterdi álemge áıgili oryndaýshy Beıonse oryndasa, qazaq dýblıajynda estradalyq ánshi Darııa Ǵabdýl shyrqady.
Bul Darııanyń ekinshi qadamy.
2012 jyly ol «Batyl júrek» fılminiń kastıngine qatysqan bolatyn. Biraq synaqtan ótpeı qalǵan eken.
«Bunyń jaqsy tustary da bar. Ol kezde dýblıajdaý degen qandaı kúrdeli úderis ekendigin túsinbeppin. Stýdııadaǵy barlyq jumys bir saǵatqa sozyldy. Meniń aldyma 60 mınýt ishinde eki saýndtrekti oryndaý mindetin qoıdy - bul ońaı sharýa emes. Ekranda kórinisti emotsıonaldy, ıntonatsııamen, daýys boıaýlarymen aıaqtaý óte qıyn», - dedi ánshi.
Darııa – Beıonse shyǵarmashylyǵynyń jankúıeri.
«X Factor Qazaqstan» tyńdaýynda ol ánshiniń repertýarynan án shyrqady.
«Meniń oıymsha, Beıonse eń úzdik oryndaýshylardyń biri, sońǵy jyldardaǵy mýzykalyq álemde negizgi fıgýra. Onyń án oryndaý máneri tehnıkalyq jaǵynan eń kúrdelilerdiń biri sanalady. Beıonseniń ánin qaıtalap aıtý qıynnyń qıyny. Maǵan qajetti ýaqytta kerekti jerden tabylý baqyty buıyrdy. Beıonseni dál meniń dýblıajdaýym – men úshin baqyt», - dedi ol.
Fılm BI Group kompanııasynyń demeýshilik qoldaýymen «Bolashaq» korporatıvtik qory men «Meloman» kompanııasynyń «Ózińnen basta» jobasy aıasynda qazaq tiline dýblıajdalǵan bolatyn.
«Ózińnen basta» jobasy - kommertsııalyq maqsattardy kózdemeıtin áleýmettik joba, jeke qazaqstandyq kompanııalar men metsenattardyń demeýshilik qoldaýymen júzege asyrylady. 9 jyl ishinde qazaq tiline 31 Gollıvýd kınotýyndy dýblıajdaldy. Jyl sońyna deıin taǵy eki fılm - «Malefısenta» jáne «Muzdy ólke 2»/«Holodnoe serdtse 2» fılmderiniń keıipkerleri qazaq tilinde sóıleıtin bolady, al kelesi jyly qazaq tiline «Walt Disney Pictures», «Pixar» jáne «Sony Pictures» stýdııalarynyń taǵy 7 fılmi dýblıajdaý josparlanǵan.
«Walt Disney Pictures» daýystyq bazasyna 100-den astam qazaqstandyq akterdiń daýsy engen. Qazaq tili Blu-Ray-de kórýge bolatyn Gollıvýd fılmderiniń 7 negizgi tilderiniń qataryna kirdi.
