Qazaqstandyq anımatorlar Reseıde taǵylymdamadan ótedi
NUR-SULTAN. QazAqparat - Qazaqstandyq anımatorlar reseılik «Soıýzmýltfılm» jáne «WizartAnimation» anımatsııalyq stýdııalarynda taǵylymdamadan ótedi. Bul týraly Májlis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.
«Búgin elimizde anımatorlardyń daıyndyǵymen T. Júrgenov atyndaǵy q azaq ulttyq óner akademııasy men Qazaq ulttyq óner ýnıversıteti aınalysady (Atalǵan joǵary oqý oryndarynda 117 bolashaq anımator oqıdy). T. Júrgenov atyndaǵy Qazaq ulttyq óner akademııasynyń «anımatsııalyq fılmniń rejıssýrasy» jáne «sýretshi-anımator» mamandyqtary boıynsha oqıtyn stýdentteri úshin reseılik «Soıýzmýltfılm» jáne «WizartAnimation» anımatsııalyq stýdııalarynda taǵylymdamadan ótý máselesi pysyqtalýda « , - dedi Eraly Toǵjanov.
Onyń aıtýynsha, aldaǵy ýaqytta «Qazaqfılm» kınostýdııasyn jańǵyrtý josparlanýda. Osy jumystar aıasynda kınostýdııany zamanaýı kıno túsirý jáne montaj jabdyqtarymen tehnıkalyq jaraqtandyrý, arnaıy kólik quraldaryn satyp alý, ınjenerlik toraptar men ǵımarattardy kúrdeli jóndeýden ótkizý, sondaı-aq túsirý alańyn salý kózdelip otyr.
«Jańǵyrtý jumystary kınostýdııanyń anımatsııalyq birlestigin de qamtıdy. «Kınematografııa týraly» Zańnyń 9-babyna sáıkes kınoteatrlarda kórsetiletin barlyq fılmder qazaq tilinde dýblıajdalýǵa, sýbtıtrlenýge nemese kadr syrtyndaǵy aýdarmamen qamtamasyz etilýi tıis. Qazaq tiline aýdarylmaǵan fılmderge otandyq prokatqa shyǵýǵa ruqsat berilmeıdi. Jalpy depýttatyq saýalda sizder atap ótken otandyq anımatsııany damytý jónindegi usynystar memlekettik tapsyrys arqyly jasalatyn mýltfılmderdiń mazmuny men sapasyn arttyrý barysynda eskeriletin bolady», - dedi Úkimet basshysynyń orynbasary.
