Qazaqstandyq-amerıkalyq JOO-lardyń І forýmy ótti
ASTANA. QazAqparat - Búgin Astanada ótken Qazaqstandyq-amerıkalyq joǵary oqý oryndarynyń І forýmy barysynda úsh tilde bilim berýdi damytý baǵyty talqylandy, dep habarlaıdy QazAqparat.
Forým jumysyna QR Bilim jáne ǵylym mınıstri E. Saǵadıev pen Qazaqstandaǵy AQSh Elshisi Dj. Krol qatysty.
Sharanyń basym mindeti ýnıversıtetter áriptestigi (qos dıplom baǵdarlamalary, taǵylymdamalar, sheteldik stýdentterdi tartý) boıynsha amerıkalyq tájirıbesin zertteý, aǵylshyn tili oqytýshylaryn daıarlaý jáne saladaǵy basqa da sharalarǵa negizdelgen.
Atap aıtqanda, sharanyń jumys bóligi QR BǴM ókilderiniń Qazaqstandaǵy bilim reformasynyń barysy jóninde tanystyrýdan bastaldy. Onda Ortalyq Azııada bilim berý habyn damytý, joǵary oqý oryndarynyń akademııalyq jáne basqarýshylyq derbestigin keńeıtý ádistemeleri, sondaı-aq qazaqstandyq bilim berý júıesiniń úsh tilde oqytýǵa aýysýy máseleleri qozǵaldy.
«Amerıka taraby forým barysynda úsh tilde bilim berýdi damytý strategııasy, Qazaqstandaǵy ýnıversıtetter áriptestigi turǵysynda strategııalyq oılaý, HHІ ǵasyr úshin aǵylshyn tilinde oqý baǵdarlamalaryn ázirleý boıynsha tanystyrylymdar jasady»,-dep atap ótilgen QR BǴM baspasóz qyzmetiniń málimetinde.
Forým aıasyndaǵy sektsııalyq otyrystarda qazaqstandyq tarap amerıkalyq joǵary oqý oryndarymen aǵylshyn tili oqytýshylaryn daıarlaý jáne ýnıversıtetter áriptestigin nyǵaıtý tájirıbesi jónindegi máselelerdi talqylady.
