Qazaqstandyq-amerıkalyq bıznes forým aıasynda birqatar kelisim rásimdeldi
ASTANA. QazAqparat - Elordada ótip jatqan Qazaqstandyq-amerıkalyq bıznes forým aıasynda birqatar kelisim rásimdeldi, dep habarlaıdy QazAqparat tilshisi.
Forým barysynda aýyl sharýashylyǵy, ınfraqurylym, avıaqurylys, tsıfrlandyrý jáne aqparattyq tehnologııalar salalaryn qamtıtyn 8 ekijaqty qujatqa qol qoıyldy. Atalǵan qujatty rásimdeýshiler qatarynda amerıkalyq taraptan Valmont, MasterCard, Honeywell jáne Sierra Nevada Corporation kompanııalarynyń ókilderi boldy.
«Ekonomıkany keńeıtýde tabysty jetistikter bar ekenin bilemiz. Muny Halyqaralyq valıýta qory da rastap otyr. Ol 2016-2019 jyldardaǵy ekonomıka ósimin atap ótti. Ekonomıkanyń shıkizattyq emes sektoryna qatysty aıtar bolsaq, onda biz ónimderdi ártaraptandyrý maqsatyna qol jetkizip qaldyq. 2018 jyly syrtqy saýda 20 paıyzǵa ósti. Biz saýda-sattyqty 100 mlrd dollarǵa jetkizýge nıettimiz. Tolyqtaı alǵanda, bizdiń ekonomıkamyz da, saýda-sattyǵymyz da sheteldik áriptesterdiń qyzyǵýshylyǵyn týǵyzyp otyr. Sondaı-aq, tikeleı shetel ınvestıtsııasynyń quıylýy 15 paıyzdan asyp ketti», - dep atap ótti QR Premer-Mınıstriniń birinshi orynbasary Asqar Mamın.
Aıta keteıik, forým jumysyna AQSh Saýda mınıstri Ýılbýr Ross pen QR Premer-Mınıstriniń birinshi orynbasary Asqar Mamın, 20-dan astam amerıkalyq kompanııanyń basshylary, qazaqstandyq bıznes ókilderi, mınıstrlikter men vedomstvo basshylary qatysty.
Esterińizge sala ketsek, AQSh-tyń Saýda mınıstri Ýılbýr Ross elimizge sapary aıasynda Elbasy Nursultan Nazarbaevpen kezdesip, sonymen birge QR Premer-Mınıstri Baqytjan Saǵyntaevpen ekonomıkalyq yntymaqtastyq máselelerin talqylady.
