Qazaqstandyq alyp kúsh ıesi bar bilgenin oqýshylarǵa úıretpek
«Qazirgi ýaqytta Aqmola oblysymen birlesken jobany iske asyrǵaly jatyrmyz. Eger Aqmola oblysy meni qoldasa, óńirdiń elýge tarta mektebin aralap, sheberlik saǵattaryn ótkizgim keledi. Ol mektepterde oqýshylarǵa ózimniń qarym-qabiletimdi pash etip, Qazaqstanda qara kúshke ıe bolý mádenıetin úıretkim keledi», - dedi ol Sputnik Qazaqstan baspasóz ortalyǵynda ótken jıynda.
Sergeı Tsyrýlnıkov júrgen jerinde qazaqtan shyqqan batyrlar men balýandardy aýzynan tastamaıtynyn aıtady.
«Biz Balýan Sholaq pen Qajymuqandy ǵana aıtyp qoımaı, Qobylandy, Qabanbaı men Raıymbek batyrlardyń erligin urpaq sanasyna sińirsek deımiz. Sebebi, urpaq tárbıesinde biz batyr babalarymyzdyń el úshin etken eńbegin shamshyraq ete bilýimiz kerek. Men ol batyrlardyń qataryna Baýyrjan Momyshulyn da qosamyn» - deıdi ol.
Alyp kúsh ıesi shamasy kelse, Qazaqstandaǵy búkil mektepti aralaǵysy keledi. Alaıda bul úshin Sergeıge qarjylaı qoldaý kerek. Al qazirgi ýaqytta el aralaý jumysyn balýan batyr óz aqshasymen atqaryp júr. Qazirdiń ózinde kóptegen oqýshylar áleýmettik jelide Sergeımen kezdesýge nıet bildiretin kórinedi.
«Men volonter sekildi eńbek etemin. Barlyq nómirlerim óz qarajatym arqyly júzege asady. Rekordtar men mektep aralaýǵa ketetin shyǵyndardyń bárin ózim kóteremin. Bul isti shamam jetkenshe jalǵastyra berem», - deıdi rekordsmen.
Eske sala ketsek, ótken jyldyń mamyr aıynda Sergeı Tsyrýlnıkov salmaǵy 148 tonnalyq vagon tirkeýli teplovozdy birneshe metrge súırep aparyp, rekord ornatqan bolatyn.
Al ótken jyldyń sońynda Qazaqstan men Reseıdiń Óńiraralyq yntymaqtastyǵynyń XV forýmynda aqmolalyq palýan Reseı Federatsııasynyń Prezıdenti Vladımır Pýtınge eki el dostyǵynyń sımvoly retinde órilgen shegelerdi syıǵa tartqan edi.
