Qazaqstandyq alyp kúsh ıesi Almat Jumanov áıgili amerıkalyq promoýshenmen kelisimge keldi
ASTANA. QazAqparat – Qazaqtyń tanymal qaıratkeri, qazaq tıtany Almat Jumanov amerıkalyq tanymal Bare Knuckle Fighting Championship promoýterlik kompanııasymen kelisimshart jasady, dep habarlaıdy QazAqparat tilshisi.
Bul týraly ol Instagram jelisindegi paraqshasynda habarlady.
A.Jumanov óz jazbasynda áıgili Bare Knuckle Fighting Championship promoýshenimen kelisimge qol qoıylǵanyn atap ótti.
Belgili bolǵandaı, amerıkalyq promoýter Devıd Feldman qazaqstandyq tıtannyń buǵan deıingi jetistikterin: vagon, poıyz, ushaq súırep, túıe arqalap ornatqan rekordtaryn baqylap kelgen.
Onyń aıtýynsha, qazaqstandyq sportshylar bul tanymal promoýshenmen buryn kelisimshartqa otyrmaǵan.
«Bare Knuckle Fighting Championship týrnıriniń negizin qalaýshy Devıd Feldman maǵan bir jyldyq kelisimshart usyndy. ıAǵnı, jylyna tórt márte jekpe-jek ótkizýge múmkindik aldym. Men judyryqtasý sportyna qatysamyn. Basty maqsatym – Amerıkada Qazaqstan týyn jelbiretý. Qudaı qalasa, armanym oryndalady», – deıdi A.Jumanov.
Ol jaqsy daıyndalyp, úzdik nátıjege qol jetkizýdi josparlap otyrǵanyn da jetkizdi. Qazaq tıtany jankúıerlerine qoldaý kórsetkeni úshin alǵysyn jetkizdi.
Bıyl jazda «Qazaq tıtany» «Iran Halkyn» nokaýtqa túsirdi. Olar boks erejesi boıynsha árqaısysy eki mınýttan tórt raýndtyq formatta judyryqtasty.
Bul tartysta «Qazaq tıtany» qarsylasyn birinshi raýndta-aq tehnıkalyq nokaýtqa túsirgen.
Buryn habarlanǵandaı, «Qazaq tıtany» gir tasyn kóterý arqyly tanymal boldy: sáýir aıynda AN-72 ushaǵyn ornynan jyljytyp, Gınnestiń rekordtar kitabyna endi.
«Irandyq Halk» bolsa, aýyr atletıka jáne bodıbıldıngte rekordtarymen erekshe tanymal boldy.
Sportshynyń boıy – 188 sm, al salmaǵy shamamen 177 kg.
Foto: instagram.com/qazaqtitan
