Qazaqstandyq alty azamat Taılandtan bezgek aýrýyn juqtyryp kelgen
ASTANA. 24 shilde. QazAqparat - Aǵymdaǵy jyly Qazaqstannyń alty azamaty Taılandtan bezgek aýrýyn juqtyryp kelgen. Bul týraly búgin Densaýlyq saqtaý mınıstrliginde ótken baspasóz máslıhaty barysynda Memlekettik sanıtarlyq-epıdemıologııalyq baqylaý komıtetiniń tóraǵasy Jandarbek Bekshın málimdedi.
Jıyn barysynda demalystyń qyzǵan ýaqytynda shetelde demalatyndardyń ózderi tańdaǵan eldegi sanıtarlyq jaǵdaıǵa basa mán berý kerektigin eskertti. «Taıland, Malaızııa, Úndistan, Pákistan elderine barǵandar dene qyzbasy, bezgek aýrýyn juqtyryp alý qaýpi úlken. Qazir Taılandta osy syrqat túrlerimen aýrǵandardyń sany 40 myńǵa jýyqtady. Aǵymdaǵy jyly Qazaqstannyń 6 azamaty bezgek dertin juqtyrǵany jáne olardyń Taılandta bolǵany anyqtalyp otyr», - dedi J.Bekshın.
Onyń sózine qaraǵanda, bezgekke shaldyqqan alty adam da Almaty qalasynyń turǵyny. Olardyń tórteýindegi aýrý belgisin áýejaıdaǵy sanıtarlyq-epıdemıologııalyq baqylaý qyzmeti anyqtasa, ekeýi dárigerge barǵanda belgili bolǵan.
