Qazaqstandyq Álı Ahmedov álemde 25 jasqa deıingi úzdik bokshylar reıtıngine kirdi
ASTANA. QazAqparat - Amerıkanyń boks týraly jazatyn Standingeightcount.com saıty (pound-for-pound) álemde 25 jasqa deıingi úzdik 25 boksshynyń reıtıngin jarııalady. Bul týraly Qazaqstan kásipqoı boksynyń «VKontakte» áleýmettik jelisindegi paraqshasyna silteme jasaǵan QazAqparat tilshisi habarlaıdy.
Habarlamada atap ótilgendeı, reıtıngtiń 24-shi satysynda WBC nusqasy boıynsha jastar arasynda birinshi aýyr salmaqta álem chempıony, qazaqstandyq boksshy Álı Ahmedovtiń (13-0, 10KO) esimi tur.
«Birinshi aýyr salmaqtaǵy qazaqstandyq boksshy Álı Ahmedov - áli kúnge deıin bokstyń úlken qupııalarynyń biri. Onyń AQSh-qa kóshýi 2019 jyly osyny ózgertýi tıis», - dep atap ótilgen materıalda.
Reıtıngtiń birinshi úshtigine japondyq Naoıa Inoýe (17-0, 15KO), Amerıka boksshysy Djervonta Devıs (20-0, 19KO) jáne Kúnshyǵys eliniń taǵy bir ókili - Koseı Tanaka (12-0, 7KO) kirgen.
Avtory: Serik Sabekov
