Qazaqstandyq áleýet boıynsha azyq-túlikpen 100 mln. adamdy qamtamasyz etýge bolady - N. Shábıev
STANA. Sáýirdiń 8-i. QazAqparat /Qanat Mámetqazyuly/ - Agrarlyq saladaǵy qazaqstandyq áleýet boıynsha azyq-túlikpen 100 mln. adamdy qamtamasyz etýge bolady.
Búgin «Kedendik odaq elderiniń agroónerkásiptik keshenin damytýdy ǵylymmen qamtamasyz etý» atty halyqaralyq konferentsııa barysynda baıandama jasaǵan QR Aýyl sharýashylyǵy mınıstrligi Strategııalyq josparlaý jáne ınnovatsııalyq saıasat departamentiniń dırektory Núrken Shábıev osylaı málim etti, dep habarlaıdy QazAqparat.
«Búgingi kúni Qazaqstan halqynyń sany 16,5 mln. adamdy qurap otyr. Degenmen, elimizdiń agrarlyq áleýeti boıynsha azyq-túlikpen 100 mln. adamǵa deıin qamtamasyz etetin múmkindigi barshylyq. Shyndyǵynda, Keńes odaǵy kezinde Qazaqstan basqa elderge astyq, et pen basqa da jemis-jıdek daqyldaryn jetkizýshi birden bir memleket bolatyn. Al búgingi kúni qurylyp otyrǵan Kedendik odaq elimizdiń agrarlyq salasy úshin jańa múmkindikterdi asha túsedi. Bunyń ózi básekege qabiletti aýyl sharýashylyǵy ónimderin óndirýge úlken qoldaý bolary haq. Sondyqtan da, biz úshin qazirgi tańdaǵy eksporttyq áleýet joǵary pozıtsııalar boıynsha ustanymdy arttyra túsý mańyzdy bolmaq», dedi N. Shábıev. Onyń aıtýynsha, Kedendik odaq aıasynda Qazaqstan bıdaıdyń qatty surypyn eksporttaý boıynsha úlken áleýetke ıe. Bul baǵyttaǵy ustanym biregeı eksporttyq saıasat engizilgennen bastap odan saıyn kúsheıe túsetin bolady. Budan keıingi elimiz úshin ornyqty eksporttyq baǵyt - un eksporty. Sońǵy úsh jylda Qazaqstan un eksporty boıynsha álem elderi arasynda kóshbasshy memleketke aınaldy.
