Qazaqstandyq alaıaqty BAÁ-den Astanaǵa jetkizdi

ASTANA. QazAqparat - Birikken Arab Ámirliginiń quqyq qorǵaý organdary asa iri kólemde alaıaqtyq jáne qoldan qujat jasaǵany úshin halyqaralyq izdestirýde júrgen Qazaqstan azamaty Shýhratjan Myrsadyqovty Astanaǵa jetkizdi.

Bul týraly QR Bas prokýratýrasynyń saıtynda habarlandy.

Tergeý organdary Myrsadyqovty 2007 jáne 2012 jyldary aldaý jolymen aqsha qymqyrǵany úshin aıyptaýda.

Myrsadyqov bank mekemesine úı qurylysynyń jalǵan qujatyn jasap, múldem joq jyljymaıtyn múlikti kepilge usynǵan. Sóıtip, bankten 7,5 mln. teńge nesıe alǵan.

Budan basqa, bankten kredıt alý úshin týysqanyn aldap, onyń múlkin kepilge qoıyp, 26,5 mln. teńge alyp, boı tasalaǵan.

Sh. Myrsadyqov Ábý-Dabı qalasynan Astanaǵa jetkizildi. Qazir ol elordanyń tergeý oqshaýlaǵyshyna qamaldy.