Qazaqstandyq alpınıst Avstralııanyń eń bıik shyńyn baǵyndyrdy
ASTANA. QazAqparat - Qazaqstandyq alpınıst Avstralııanyń eń bıik shyńy Kostsıýshkony baǵyndyrdy, dep habarlaıdy QazAqparat.
Qazaq Geografııalyq Qoǵamy «7 shyń + 2 Polıýs» halyqaralyq alpınıstik baǵdarlamany júzege asyrýdy jalǵastyrýda.
11 aqpanda, Qazaq Geografııalyq Qoǵamynyń - «7 shyń» baǵdarlamasyn oryndaý barysynda, Andreı Almazov Avstralııanyń bıik núktesi Kostsıýshko (2228m) taýyn baǵyndyrdy. Almazovtyń aıtýynsha, shyńdy baǵyndyrýǵa birneshe saǵattar ketken. Kostsıýshko shyńy Ońtústik Jańa Ýels shtatynda ornalasqan ulttyq parktiń aýmaǵynda ornalasqan.
«Kostsıýshkony baǵyndyrý - bul aldymen Jasyl qurlyqpen tanysýdyń jáne álemniń basqa bir buryshyn aıaq basýdyń sáti. Atalǵan jobada QazGeo komandasynyń múshesi ataný úlken baqyt», - deıdi taý gıdi jáne saıahattaýshy Andreı Gýndarev.
«7 shyń + 2 Polıýs» halyqaralyq alpınıstik baǵdarlamasy aıasynda Qazaq Geografııalyq Qoǵamynyń komandasy tórt shyńdy baǵyndyryp úlgerdi.
Olar - Ońtústik Amerıkanyń eń bıik shyńy - Argentınadaǵy Akonkagýa, Eýropanyń eń bıik núktesi - Elbrýs, Antarktıdadaǵy eń aýyr shyń - Vınson, Avstralııanyń eń bıik taýy - Kostsıýshko.
Endi qazaqstandyq topqa Everest, Makkınlı men Kılımandjarony baǵyndyrý ǵana qaldy.
Sonymen qatar 2015 jyly Soltústik polıýske, 2016 jyly Ońtústik polıýske shańǵy ekspedıtsııasy sátti aıaqtaldy.
«Qazaq Geografııalyq Qoǵamy Qazaqstan Týyn barlyq qurlyqtaǵy jeti shyń men eki polıýske jetkizýdi aldyna maqsat etip qoıdy. Atalmysh baǵdarlamaǵa qatysyp otyrǵan sportshylar úshin álemdi kórý jáne Qazaqstan atyn tanymal etý múmkindigi berilip otyr», - dedi QazGeo qamqorshylyq keńesiniń tóraǵasy Nurlan Ábdýov.
