Qazaqstandyq agrarshylarǵa 200 myńǵa jýyq traktor kerek
ASTANA. QazAqparat - Qazaqstandaǵy agrarshylarǵa 200 myńǵa jýyq traktor kerek. Bul týraly «QazAqparat» HAA tilshisine «Qazaqstan mashına jasaýshylarynyń odaǵy» ZTB basqarma tóraǵasy Esirkep Ábdirahmanov málimetti, dep habarlaıdy «QazAqparat» HAA tilshisi.
«Eger tarıhqa úńilsek, 1990 jyly Qazaqstanda shamamen 230 myń traktor bolǵan edi. Traktorlardyń sany odan beri 80 myńǵa kemip, búgingi kúni 150 myń danany ǵana qurap otyr. Osy 150 myńnyń 120 myńy eskirip ketti. Demek, traktorlardyń 30 myńy ǵana qoldanýǵa jaramdy dep aıtýǵa bolady. Menińshe, Qazaqstandaǵy sharýalarǵa shamamen 200 myń traktor kerek. Al ony satyp alý úshin kim aqsha beredi? Bizdiń sharýa qojalyqtardyń jylyna 1 000 ǵana traktor satyp alýǵa múmkindigi bar. Kombaın jáne ózge de tehnıkalar boıynsha jaǵdaı osyndaı», - deıdi Esirkep Ábdirahmanov.
Esirkep Ábdirahmanov óz sózinde Qazaqstanda aýyl sharýashylyǵy jáne qosalqy tehnıkalardy qurastyrýmen aınalysatyn 120 kásiporynnyń baryn alǵa tartady. Bul turǵyda ózge qurastyrýshylardan oq boıy ozyq turǵan 5-6 kásiporyn bar.Olar jalpy tehnıkanyń 20 paıyzyn óndiredi.
«Aýyl sharýashylyǵy mınıstrligi osy saladaǵy kásiporyndarǵa otandyq tehnıkalardy satyp alǵan jaǵdaıda aıtarlyqtaı jeńildik usynady. Buǵan qosa mınıstrlik aýyl sharýashylyǵy tehnıkalaryn qurastyratyn kásiporyndardy jańartý úshin qarajat bólmek», - deıdi ol.
Eske sala ketsek, búgin Astanada «Agrarlyq nesıe korporatsııasy» AQ, «QR kredıttik seriktesteriniń qaýymdastyǵy» zańdy tulǵalar birlestigi, Lızıng kompanııalardyń qaýymdastyǵy men «Qazaqstan mashına jasaýshylarynyń odaǵy» ZTB basshylary fermerler úshin qosalqy aýyl sharýashylyǵy tehnıkalaryn tıimdi sharttarmen satyp alýǵa baǵyttalǵan tórt jaqty kelisimge qol qoıǵan bolatyn. Kelisim boıynsha qosalqy tehnıkalardy satyp alý úshin sharýalarǵa 5 mlrd teńge bólinip otyr. Olardyń 1,8 mlrd teńgesi nesıelik seriktestikter, 3,2 mlrd teńgesi lızıngtik kompanııalar arqyly berilmek.
