Qazaqstandyq abıtýrıentter JOO-ǵa túsý úshin eki emtıhan tapsyrýy múmkin
ASTANA. 28 naýryz. QazAqparat - Bilim berýdi damytýdyń 2011-2020 jyldarǵa arnalǵan memlekettik baǵdarlamasyna sáıkes,
2015 jylǵa qaraı mektepten keıingi emtıhandy bir bólek, al joǵary oqý ornyna túsý synaǵy bólek tapsyrylady. Osyǵan oraı QR Bilim jáne ǵylym mınıstrliginiń Ulttyq testileý ortalyǵy emtıhan tapsyrýdyń jańa júıesin usynyp otyr.
«Osy másele boıynsha biz jumysty bastap ta kettik. Máselen, bıyl aqpan aıynda halyqaralyq sarapshylardyń qatysýymen ótken semınarda biz joǵary oqý ornyna túsý emtıhanyn ekige bólip ótkizýdi usyndyq. Onyń birinshisi - jalpy test. Onda Elbasynyń búgingi kóterip júrgen máseleleri eskerilip, matematıka jáne mátindi oqyp túsiný suraqtary bar. Ol arqyly talapkerlerdiń fýnktsıonaldy saýattylyǵy tekseriledi. Oǵan memleket negizderi men memlekettik tilge qatysty saýaldardy da qosýǵa ábden bolady. Demek, testtiń bul túri tek bir pánniń aıasynda ǵana qalmaı, jalpy bilim berý negizderin qamtıdy. Negizgi maqsat - test tapsyrýshynyń oı qabiletin tekserý. Ekinshi test ol - beıindik pánder. Máselen, medıtsına mamandyǵyna túsetin túlekter hımııa men bıologııa pánderi boıynsha test tapsyrady. Árıne, ázirshe bul tek usynys qana. Deıturǵanmen, biz ol testterdiń nusqasyn daıarlap, mektep oqýshylar arasynda tekserip te kórdik. Kelesi jyly aýqymdy tájirıbe ótkizetin shyǵarmyz», - deıdi Ulttyq testileý ortalyǵynyń dırektory Qalı Ábdıev.
