Qazaqstandyq 8 sportshy HOK-niń stıpendııasyna ıe boldy
ASTANA. Qazaqparat - Halyqaralyq Olımpıadalyq komıteti 6-18 qazan kúnderi Býenos-Aıreste (Argentına) ótetin úshinshi jasóspirimder Olımpıadasyna qatysatyn qazaqstandyq segiz sportshyǵa stıpendııa taǵaıyndady, dep habarlaıdy QazAqparat tilshisi.
QR Ulttyq Olımpıadalyq komıtetiniń baspasóz qyzmeti taratqan málimette, atalǵan stıpendııaǵa Anastasııa Rezvantseva, Dıana Nazarova, Kırıll Shatskov, Alen Ohotınskıı (tórteýi de júzý sportynan), Eldar Imanqulov (atý), Tamıla Mýrıdova (semserlesý), Nılýfar Raımova (áıelder kúresi) jáne Álıhan Mustafınder (sadaq atý) ıe bolǵan. Endi bul sportshylardyń Býenos-Aıreste ótetin Olımpıada oıyndaryna daıyndalýǵa ketetin shyǵyndaryn HOK-ti óz moıyndaryna alady.
«HOK-tiń «Olımpıadalyq yntymaqtastyq» baǵdarlamasymen birlese jumys isteý Qazaqstan UOK-tiń negizgi halyqaralyq baǵyttarynyń biri. Aǵymdaǵy jyldyń maýsym aıynda UOK Argentınadaǵy Olımpıada oıyndaryna joldama utyp alǵan sportshylardy qoldaý maqsatynda stıpendııa taǵaıyndaý týraly ótinimdi HOK-ke joldaǵan bolatyn. HOK kandıdattardy halyqaralyq sport federatsııalarymen birlese otyryp tańdady. Sportshylardy tańdaý barysynda genderlik teńdik, sporttyq áleýet pen jetistikter basty nazarǵa alyndy», - deıdi UOK Halyqaralyq qatynastar departamentiniń dırektory Álimjan Aqaev.
Aıta keteıik, búginge deıin qazaqstandyq 36 jas atlet sporttyń 11 túri boıynsha Jasóspirimder Olımpıadasyna 27 lıtsenzııa jeńip aldy. Іrikteý kezeńderi áli de jalǵasýda. Odan bólek, 2020 jyly ótetin Tokıo Olımpıadasyna daıyndyq júrgizilip jatyr.
