Qazaqstandyq 5 oqýshy halyqaralyq bıznes-grantqa ıe boldy
ATYRAÝ. QazAqparat –Atyraýdaǵy Nazarbaev Zııatkerlik mektebiniń 5 oqýshysy halyqaralyq «MINIBOSS» bıznes-mektebiniń bilim grantyna ıe boldy, dep habarlaıdy QazAqparat.
Kásipkerlikti damytýǵa arnalǵan oqý ornynda Nazarbaev Zııatkerlik mektebiniń oqýshylary bir jyl tegin bilim alady. Daryndy balalardyń tól jobasyn daıyndaýǵa Qazaqstan men Ulybrıtanııanyń bızneste júrgen jetekshi mamandary qoldaý kórsetýdi kózdep otyr.
«Sońǵy úsh jyl boıy «MINIBOSS» Qazaqstandaǵy jastardyń kásipkerlik áleýetin arttyrýdy qolǵa aldy. Al Atyraýda bıyl jumysyn bastaǵan ortalyq óńirdegi jas ónertapqyshtardyń bastamalaryn qoldaýǵa nıet bildirdi. Halyqaralyq bıznes-mekteptiń qoldaýyna alǵashqylardyń qatarynda Nazarbaev Zııatkerlik mektebiniń bes oqýshysy ıe boldy. Olar mektepshilik konkýrstarda kózge túsken, áleýmettik qoldaýdy qajet etetin otbasydan shyqqan balalar», - deıdi bıznes-mekteptiń dırektory Lılıana Hegaı.
Onyń aıtýynsha, atalǵan oqý ornyn Eýropalyq bıznesti damytý qaýymdastyǵy qarjylandyrady. Qazir Zııatkerlik mekteptiń bes oqýshysyna 7500 eýro kólemindegi bilim granty bólindi. Oqýshylar teorııalyq bilimdi túrli oıyndar, tájirıbeler negizinde meńgeredi. Keıin ózderiniń jobasyn ınvestorlar aldynda qorǵaıdy. Usynǵan ıdeıa sátti bolsa, atyraýlyq oqýshylar ulttyq chempıonatqa qatysady. Sondaı-aq, jobany ári qaraı qarjylandyrý joly qarastyrylatyny belgili boldy.
«Maqsatymyz – álemniń 15 elinen bıznestegi jastardyń bas qosatyn aqtyq saıysyna joldama alý. Oǵan qatysý úshin tynymsyz eńbek etýimiz kerek. Qazirgi sátte álemniń alpaýyt memleketteriniń daryndy balalary óz jobasyn daıyndaýdy bastap ketti», - deıdi halyqaralyq «MINIBOSS» bıznes-mektebiniń dırektory.
Eske sala ketelik, budan buryn atyraýlyq oqýshylardyń ǵylymı jumysy halyqaralyq jınaqqa engen edi.
