Qazaqstandyq 24 júk kóligi Ýkraınadan shyǵa almaı tur - UKP

NUR-SULTAN. QazAqparat - «Atameken» ulttyq kásipkerler palatasy soǵys is-qımyldarynyń bastalýyna baılanysty Ýkraınadan shyǵa almaı jatqan jáne kórshi memleketterdiń shekara mańy aımaqtarynda ornalasqan otandyq júk kólikteri týraly derekter jınaýǵa bastamashy boldy, dep habarlaıdy QazAqparat.

Qazir Ýkraınadaǵy qazaqstandyq júrgizýshiler ómirine, sonymen qatar kólik kompanııalarynyń taýardy jetkizý jáne saqtaýǵa qatysty mindettemelerine qaýip tónip tur.

«Atameken» UKP málimetinshe, qazir 24 júk kóligi Ýkraınadan shyǵa almaı tur.

Olardyń kóbi Kıev oblysynda turyp qalǵan, 3 kóliktiń ǵana júgi joq.

«Biz aqparatty jedel jınaý maqsatynda júrgizýshilerdiń barlyq chatyna arnaıy, salalyq qaýymdastyqtarǵa formany tarattyq. Túsken aqparatty ýákiletti organdarǵa kelgen boıda jiberip jatyrmyz. Sondaı-aq, vedomstvolarǵa hat joldap, qazaqstandyq tasymaldaýshylardyń Ýkraına aýmaǵynan Polsha, Belarýs Respýblıkasy arqyly shyǵýy úshin «jasyl dálizdi» qamtamasyz etý máselesin Reseı, Belarýs, Ýkraına, Polsha jáne basqa da taraptarmen pysyqtaýdy suraımyz», – dedi «Atameken» UKP Logıstıka jáne tasymaldaý departamentiniń dırektory Murat Amrın.

UKP derekterdi jınaýdy jalǵastyrady.

Eger siz nemese kólik júrgizýshi Ýkraınadan shyǵa almaı jatsa, deregińizdi myna nómirge joldaýdy suraımyz: 1432, [phone] (UKP baılanys ortalyǵy).