Qazaqstandyq 2 jeńil atlet álem chempıonatyna joldama aldy
ASTANA. QazAqparat - Ashhabadtaǵy Azııa oıyndarynda 2 qazaqstandyq jeńil atlet kelesi jyly ótetin jabyq keshendegi álem chempıonatynyń normatıvin oryndady, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Olar - Olga Rypakova men Mıhaıl Lıtvın.
Atalǵan málimetke súıensek, qos atletimiz bul jetistikke Ashhabadtaǵy Azııa oıyndarynda qol jetkizgen.
Álem chempıonaty 2018 jyly Ulybrıtanııanyń Bırmıngem qalasynda ótedi. Osymen 17-shi ret uıymdastyrylatyn dúnıejúzilik jarys 2018 jyldyń 1-4 naýryz aralyǵynda ótedi dep josparlanǵan.
IAAF talaby boıynsha jarysqa qatysý úshin 2017 jyldyń 1 qańtary men 2018 jyldyń 19 aqpany aralyǵyndaǵy týrnırlerde belgingen normatıvti oryndaýy kerek.
Búgingi tańda Olga Rypakova men Mıhaıl Lıtvın joldama alyp úlgerdi. Úsh qarǵyp sekirýden áıelder arasynda normatıv - 14,30 metr. Rypakova bul maýsymda 14, 77 metrge deıin sekirgen bolatyn. Al Lıtvın Ashhabadta 400 metrge júgirip, qola júldeni jeńip alǵanda márege 46, 51 sekýndta jetken edi. Álem chempıonatynyń normatıvi - 46, 70 sekýnd.
Osylaısha, eki atlet Bırmıngemdegi álem chempıonatyna joldama alyp otyr. Rypakovanyń bul jarysqa qatysatyny nemese qatyspaıtyny ázirge belgisiz.
Aıta keteıik, Bırmıngemde 26 medal jıyntyǵy sarapqa salynady.
