Qazaqstandyq 160 daryndy bala San-Marınoda óner kórsetedi
ALMATY. QazAqparat - Almatyda «Tanysý Almaty» dástúrli kóp janrly óner jáne mádenı baıqaý-festıvali óz máresine jetti. Baıqaý nátıjesi boıynsha 160 daryndy bala San-Marınoda Qazaqstannyń namysyn qorǵaýǵa joldama utyp aldy, dep habarlaıdy QazAqparat tilshisi.
Bul baıqaý Qazaqstannyń San-Marıno memleketindegi konsýldyǵynyń qoldaýymen ótip otyr.
Italııadan kelgen óner maıtalmandary - qazylar alqasynyń aldynda bıyl 21 naýryzdan bastap 900 astam bala óner kórsetti.
«Baıqaý nátıjesi boıynsha 5 bas júlde berildi. Sonymen qatar, qazylar alqasynyń múshesi Paýlo Londı 2 arnaıy syılyq taǵaıyndady. Arnaıy syılyq vokal boıynsha óner kórsetken 2 balaǵa, ekinshisi bıshiler ujymyna berildi. Bul bıshiler ıtalıandyqtardy myń buralǵan bıimen tań qaldyrdy. Olar az ýaqyt ishinde birneshe ulttyń bıin bılep, ultaralyq tatýlyq tilinde syr shertip berdi. Jalpy alǵanda 160 bala San-marınodaǵy halyqaralyq baıqaýda óz ónerin kórsetýge joldama aldy. Bas júlde ıegerleri men arnaıy syılyq alǵan ónerpazdarǵa Italııadaǵy baıqaý uıymdastyrýshylary jol-tamaq shyǵynyn kóterip alatyn boldy», - dedi Halyqaralyq mádenı «Festival&Contest» qaýymdastyǵynyń ókili Janna Baıbaqova.
San-Marınodaǵy baıraqty báseke bıyl 14 shilde men 20 shilde aralyǵynda ótedi.
Aıta ketsek, Eýropa jurshylyǵy aldynda álemniń túkpir-túkpirinen kelgen balalar horeografııa, vokal, hor, aspapta oınaý, orkestr, folklor, teatr, beıneleý, foto-shyǵarmashylyq boıynsha óner kórsetetin bolady.
