Qazaqstandyq 135 myń volonter bir kúnde 6 myń tonna qoqys jınady
Ekologııalyq birlestikter QR Ekologııa, geologııa jáne tabıǵı resýrstar mınıstrliginiń qoldaýymen ár aımaqta senbilik ótkizdi.
Sharaǵa Qazaqstan boıynsha barlyǵy 135 073 volonter atsalysty. Olar 6020 tonna qoqys jınady. Onyń ishinde 1084,49 tonna shyny, 2145,1 tonna plastık, 373,495 tonna rezeńke, 407,935 tonna qaǵaz, 890,24 tonna metall qaıta óńdeýge jiberildi.
Jınalǵan qoqys kólemine baılanysty kóshbasshylar úshtigine Almaty, Pavlodar, Aqtóbe oblystary endi.
«Almaty qalasyn aralaǵanda qoqys byltyrǵyǵa qaraǵanda azyraq ekeni anyqtaldy. Menińshe, turǵyndardyń mádenı deńgeıi artyp keledi. Qoqysty iriktep salýdyń arqasynda biz tabıǵatymyzdy lastaýdan aman alyp qalamyz. Osy maqsatta Qazaqstan ekologııalyq uıymdary qaýymdastyǵy StopMusor kampanııasyn bastady», - dedi atalmysh qaýymdastyqtyń basqarma tóraǵasy Aıgúl Soloveva.
Odan bólek, aktsııa qatysýshylary 5725 aǵash otyrǵyzdy.
Senbilik kezinde aǵash otyrǵyzý sharalary barlyq óńirde ótti. Ekologııa, geologııa jáne tabıǵı resýrstar mınıstri Maǵzum Myrzaǵalıevtiń aıtýynsha, b ul, Prezıdent Qasym-Jomart Toqaevtyń Joldaýynda berilgen orman alqaptarynda - 2 mlrd, eldi mekenderde 15 mln aǵash otyrǵyzý tapsyrmasyn oryndaýǵa baǵyttalǵan búkilhalyqtyq aktsııanyń tek bastamasy.
«Aǵash otyrǵyzý el boıynsha áli jalǵasyn tabady», - dedi ol.
Elimizde naýqandy Qazaqstannyń ekologııalyq uıymdary qaýymdastyǵy, «Let’s do it, Qazaq Eli», Jasyl ekonomıkany qoldaý jáne G-Global-dy damytý koalıtsııasy, «Zhasyl Qalqan», sondaı-aq «Stop Musor» jobasy men #Birge#TazaQazaqstan ekologııalyq qozǵalysynyń músheleri uıymdastyrdy.
Jyl saıyn «World Clean Up Day» ǵalamdyq aktsııasyna 157 memleketten 18 mln erikti qatysady. Bıyl olarǵa tek kúrekpen, qolǵappen ǵana emes, maska kıip, áleýmettik qashyqtyqty saqtaı otyryp jumys isteýge týra keldi.
