Qazaqstandyq 12 jasar pıanıst Parıjde jas mýzykanttardyń halyqaralyq baıqaýynda jeńimpaz atandy

Baıqaý Frantsııa astanasynda aǵymdaǵy jyldyń 11-21 sáýiri aralyǵynda ótti. Onda pıanısterden bólek, alt, skrıpka, vıolonchel jáne taǵy da basqa atalymdar boıynsha álemniń 30 memleketinen kelgen 6-26 jas aralyǵyndaǵy úmitkerler baqtaryn synady. Tek pıanısterdiń ózi - 122 talapker boldy. Onyń 66-sy - balalar, qalǵan 56-sy - jastar.

Ábdiahmet Grıgtiń «Iz karnavala» men Sergeı Slonımskııdiń «Mýltfılm s prıklıýchenııamı» atty shyǵarmalaryn oryndady. Jas órenniń qabiletine tánti bolǵan qazylar alqasy, zalda otyrǵan kásibı mýzykanttar men ózge de kórermender oryndarynan turyp qoshemet kórsetti.

Pıanısterdiń sheberligin ártúrli memleketterden kelgen 30-dan astam kásibı mýzykant baǵalady. Bas júlde otandyq jas pıanısimizge buıyrsa, birinshi oryndy qytaılyq, ekinshi oryndy tatar qyzy, úshinshi oryndy japondyq balǵyn aldy. Baıqaýdyń bas júldesin ıelengen Á.Orazbaqovqa shilde aıyna Zaltsbýrg qalasyna joldama tabystaldy. Onda elordalyq jas óren ataqty pıanıst, professor Kemerlıngtan sheberlik sabaǵyn alatyn bolady.

«Konkýstyń negizgi júldesin ıelengenimdi bilgende qatty qýandym. Ózim úshin de, elim úshin de. Óıtkeni, ol jalǵyz meniń emes, Qazaqstannyń jeńisi! Maǵan senim artyp, oqytyp, kóp nárseni úıretip júrgen ustazym - Dına Mámbetovaǵa aıtar alǵysym sheksiz», - degen balǵynnyń aldaǵy úlken jospary - aǵymdaǵy jyly kúzde Amerıkada ótetin taǵy bir halyqaralyq baıqaýda baq synaý.

Aıta keteıik, Á.Orazbaqov Astanadaǵy Qazaq ulttyq óner ýnıversıteti mektebiniń 6-synybynda oqıdy. Jas pıanıstiń Parıjge baryp-qaıtýyna demeýshi bolǵan - QR Mádenıet mınıstri Muhtar Qul-Muhamed pen «Qazaq áýenderi» AQ dırektory Ǵalym Ahmedıarov.

Á.Orazbaqov 2010 jyly Rımde ótken Motsart atyndaǵy jas pıanısterdiń V halyqaralyq baıqaýynyń da bas júldesin qanjyǵasyna baılaǵan bolatyn.