Qazaqstandyq 1000 áskerı qyzmetshi jańa páterlerdiń ıesi atanady

ASTANA. QazAqparat - Aǵymdaǵy jyly josparlanǵan turǵyn úı qurylysynyń búgingi kúnge deıin 60% aıaqtaldy. Qazirgi kezde barlyq obektilerde ishki jóndeý jumystary men oǵan tıesili aýmaqtardy abattandyrý júrgizilip jatyr. Jospar boıynsha jarty jyldan keıin QR QK 1000 áskerı qyzmetshisi jáne olardyń otbasy músheleri jańa páterlerge qonystanbaq, dep habarlady QR Qorǵanys mınıstrliginiń baspasóz qyzmetinen.

Astana, Almaty qalalarynda, Gvardeısk áskerı qalashyǵynda, sondaı-aq Saryózek, B. Momyshuly, Otar jáne Arnasaı aýyldarynda jańa turǵyn úıler turǵyzylýda. Atap aıtsaq, 1000 turǵyn úıdiń jalpy aýmaǵy 70 459, 7 sharshy metrdi quraıdy. Bıylǵy jyly barlyǵy 92 580 sharshy metrdi quraıtyn turǵyn úı alańyn turǵyzý, jóndeý jáne tapsyrý josparlanyp otyr. Onyń aıasynda Astana, Almaty, Óskemen, Semeı, Taldyqorǵan, Qyzylorda, Qaraǵandy, Taraz, Shymkent, Pavlodar, Qostanaı, Jarkent, Temirtaý jáne Aıagóz qalalarynda,sondaı-aq Gvardeısk, Saryózek, B.Momyshuly, Otar, Arnasaı jáne Aqmol aýyldaryndaǵy 1 320 áskerı qyzmetshi qyzmet ótep júrgen oryndarynda sapaly jaı-kúımen qamtamasyz etiledi.