Qazaqstandyq 100 magıstrant pen doktorantqa Frantsııa JOO-laryna grant beriledi
ASTANA. QazAqparat - Búgin Astana qalasynda Qazaqstan Respýblıkasynyń Bilim jáne ǵylym mınıstrligi men Frantsýz Respýblıkasynyń Eýropa jáne syrtqy ister mınıstrligi arasyndaǵy «Abaı-Vern» baǵdarlamasyn iske asyrý týraly kelisimge qol qoıyldy.
Bul týraly QR BǴM baspasóz qyzmeti habarlaıdy.
Qazaqstandyq taraptan kelisimge Bilim jáne ǵylym mınıstri Erlan Saǵadıev, frantsýz tarapynan Qazaqstandaǵy Tótenshe jáne ókiletti elshisi Fılıpp Martıne qol qoıdy.
Baǵdarlama aıasynda ekinshi jylǵy bilim alýshy 90 magıstrant pen qazaqstandyq joǵary oqý oryndarynda bilim alyp jatqan 10 doktorant Frantsııanyń joǵary oqý oryndaryna baratyn bolady.
Magıstranttardyń bilim alý merzimi 10 aı (qyrkúıek-maýsym), al doktoranttardyń oqý merzimi 3 jyl, ár jylda 6 aıdan (qyrkúıek-aqpan) bilim alady.
Qazaqstan tarapy ár bilim alýshyǵa stıpendııa tóleýdi óz moınyna aldy (1 magıstrantqa - 800 eýro; doktorantqa - 1200 eýro).
Frantsııa tarapyna tegin bilim alýdy qamtamasyz etý; memlekettik joǵary oqý oryndarynda tirkeý tóleminen bosatatyn Frantsýz Úkimetiniń stıpendıat mártebesin berý; Frantsýz áleýmettik saqtandyrýynyń jalpy júıesine tirkeý; tegin uzaqmerzimdi stýdenttik vıza; stýdenttik jataqhanalarda oryndardy bólip taratý kezinde basymdylyqty usyný; turǵyn jerdi tóleýge, sonymen qatar «clé» júıesin paıdalanýǵa (turǵyn úıdi jalǵa alǵanda Frantsýz Memleketi kepilger bolyp tabylatyn kezde ) kómek alý; mádenı baǵdarlamalar men is-sharalarǵa qatysý úshin jeńildetilgen tarıfterdi qamtamasyz etý syndy birqatar mindettemeler júkteldi.
Baǵdarlama jas zertteýshilerdiń mobıldiligin damytýdaǵy jańa ımpýlsti, sondaı-aq ǵylym salasyndaǵy sońǵy ınnovatsııalarǵa qoljetimdilikti, frantsýz tildi eldermen ǵylymı qatynastardy keńeıtý maqsatynda alǵy eýropalyq ǵylymı ortalyqtar jáne zerthanalarmen yntymaqtastyqty jandandyrýdy qamtamasyz etedi.
