Qazaqstandyq 10 boksshy álem chempıonatynyń jartylaı fınalyna shyqty

ASTANA. QazAqparat - Býdapeshtte ótip jatqan bokstan jastar arasyndaǵy álem chempıonatynda 10 otandasymyz jartylaı fınalǵa shyqty, dep habarlaıdy QazAqparat tilshisi.

QR Boks federatsııasynyń baspasóz qyzmetiniń habarlaýynsha, elimizdiń atynan jarysqa qatysqan 19 sportshynyń 10-y jartylaı fınalǵa shyqqan.

Shırek fınaldyń qorytyndysyna sáıkes jartylaı fınalǵa 24 eldiń sportshylary shyǵyp otyr.

Shırek fınalda Aıbek Oralbaı (91 keli) AQSh ókili Devıd Stıvensondy tize búktirse, Damır Toıbaı (+91 keli) jergilikti Feher Kappanıdi utty. Aızada Іslámǵalı (54 keli) úndi qyzy Dıve Pavardan basym tústi. Jansaıa Ábdiraıymova bolsa reseılik Lıýbov Sharapovadan aılasyn asyrdy.

Búgin alǵashqy jartylaı fınal kezdesýleri bastaldy. Oǵan Mahmud Sabyrhan (49 kg), Ermahan Jaqpekov (69 kg), Nurbek Oralbaı (75 kg), Saǵyndyk Toǵambaı (81 kg), Damır Toıbaı (+91 kg), Gúzál Sadyqova (81 kg), Jansaıa Ábdiraıymova (51 kg), Anel Qudaıbergen (48 kg) men Aızada Іslámǵalı (54 kg) shyǵady.