Qazaqstandyq 1 myń eksporttaýshy shetel naryǵyna shyǵa alady

NUR-SULTAN. QazAqparat – «Kásipkerlikti damytý» ulttyq jobasy aıasynda 1 myń qazaqstandyq eksporttaýshy kásipker syrtqy naryqqa shyǵý múmkindigine ıe bolady. Bul týraly elimizdiń Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Shıkizattyq emes eksportty ilgeriletý baǵytyndaǵy jumys jalǵasyn tabady. Eksporttyq akseleratsııa baǵdarlamasy shetelde kásibin dóńgeletip júrgen eksporttaýshylardyń múmkindigin arttyrsa, salaǵa endi kelgender úshin úlken qoldaý bolady. Sondaı-aq, kásibin el kóleminen tys jerde damytqysy kelgen 1 myń belsendi eksporttaýshynyń syrtqy naryqqa shyǵýǵa múmkindik jasalady. Jáne Alibaba, Amazon, OZON sekildi iri saýda platformasyna otandyq 350-ge jýyq eksporttaýshyny shyǵarý jaǵy qarastyrylyp jatyr», - dedi Áset Erǵalıev OKQ-de ótken baspasóz máslıhatynda.

Sonymen qatar mınıstr eksportpen shuǵyldanatyn kásipkerlerdi memlekettik qoldaýdyń taǵy birneshe tetigin atap berdi.

«Olardyń qatarynda eksporttyq qarjylandyrý jáne saqtandyrý. Eksporttaýshylardyń shyǵyny óteý. Atap aıtqanda, saýda alańyn jalǵa alýdy tólep berý, sheteldik sertıfıkattaýdan ótýde súıemeldeý, akkredıtatsııa, ınspektsııa jáne taýardy shetelde jarnamalaý. Odan bólek, otandyq eksporttaýshylar sheteldik áriptesterimen ózara tájirıbek almasyp, seriktistik qarym-qatynas ornatý maqsatynda halyqaralyq túrli is-sharalarǵa qatysatyn bolady», - deıdi ol.

Onyń aıtýynsha, atalǵan sharalar júzege asqan jaǵdaıda shıkizattyq emes eksport kólemi 2 esege artyp, 41 mlrd AQSh dollaryn quraıtyn bolady.

Buǵan deıin Áset Erǵalıev Ulttyq joba aıasynda qazaqstandyq kásipkerlerdiń shetelde taǵylymdamadan ótetinin málim etti.