Qazaqstandy jarqyn bolashaq kútip tur - koreıalyq ǵalym
ASTANA. QazAqparat - Álemdegi tórt eń iri ǵylymı baspa úıleriniń biri sanalatyn «Elsevier» dırektorlary keńesiniń tóraǵasy Chı Iongsýng Qazaqstannyń ǵylymı zertteý nátıjelerine joǵary baǵa berdi, dep habarlaıdy «QazAqparat» HAA tilshisi.
Chı Iongsýng jylyna álemdegi barlyq ǵylymı jýrnaldardyń tórtten birin shyǵaratyn «Elsevier» baspa úıinen Astanaǵa arnaıy kelip otyr. Ol Qazaqstanǵa árbir ret kelgen saıyn Astana qalasynyń ozyq sáýletine qyzyǵa qaraıtynyn aıtady. Ásirese, sheteldik meıman Astananyń áýejaıynan kele jatyp, alyp shar - «Nur Álemdi» kórip, tań qalǵan. Meımanǵa «EKSPO-2017» halyqaralyq kórmesi úshin boı kótergen «Nur Álem» - Qazaqstannyń ǵylym men ınnovatsııaǵa umtylǵanynyń sımvoly ispettes kóringen eken.
«Nur Álemdi» alǵash kórgen kezimde bıiktigi 30 metrlik Ońtústik Koreıanyń ǵylymı baǵynda jasalǵan «Daejeon Expo-93» shary kóz aldyma elestedi. Men ómir esigin ashqan ýaqytta Ońtústik Koreıa álemdegi eń kedeı elderdiń biri bolatyn. Ár adamnyń basyna shaqqandaǵy ishki jalpy ónim 1961 jyly 90 AQSh dollaryna teń edi. «EKSPO-1993» kórmesine tuspa-tus ǵylym men tehnologııaǵa salynǵan ulttyq ınvestıtsııadan keıin Ońtústik Koreıa qazirgi tańda ekonomıka jaǵynan álemde 11-shi orynnan kórinip otyr. Búgingi kúni men «Nur Álemdi» men sizderdiń ǵylymdy damytýǵa degen talpynystaryńyzdy kórgennen keıin dál osyndaı jarqyn bolashaq Qazaqstandy da kútip tur degen oıǵa keldim», - deıdi ol.
Chı Iongsýngtyń aıtýynsha, Qazaqstan sońǵy jyldary ǵylym men tehnologııa qarjy bólýdi arttyryp keledi. Qazaqstannyń memlekettik-jekemenshiktik sektorynda jáne ǵylym spektrinde qarjylandyrý kóbeıip otyr.
«3 V» qurylymy týraly atap ótkim keledi. Ol ónimniń kólemi, jyldamdyǵy men ártúrligi degendi bildiredi. Dál osy úsh artyqshylyq álemdegi elderdiń ǵylymı dúmpýine ákeledi. Osyndaı ǵylymı dúmpý Qazaqstanda sezilip kele jatqanyn kórip otyrmyz. Qazaqstanda ǵylymı nátıjelerdi ınvestıtsııalaý boıynsha kóptegen jumystar atqarylyp keledi. Búkilálemdik bank pen Qazaqstannyń tehnologııalardy kommertsııalandyrý boıynsha birlesken jobalarynyń nátıjelerin baqylaı otyryp, osylaı dep oı túıdik. Munaı óndirýdegi polımerdi ysyrý nemese bıomedıtsına jumysyndaǵy DNK júıesin testileý jetistikteri zerthanalarda qalyp qoımaı, birden naryqqa jol tartyp jatyr», - deıdi sheteldik meıman.
Ol sonymen birge, Qazaqstandaǵy ǵylymı ósim shekaramen shektelip qalmaı, halyqaralyq seriktesterdi tartyp kele jatqanyn tilge tıek etti.
«Úkimetti ǵana emes, bıznestiń de ǵylymdy qarjylandyrýǵa kúsh salatyn ýaqyty keldi. Ǵylymı kórme bıznestiń zor áleýetin kórsetedi. Qazaqstanda ǵylymı dúmpýdiń baryn kórip otyrǵannan keıin QR BǴM-men seriktese jumys atqarýdy asyǵa kútemiz. Búgin biz Qazaqstanda Science Direct jáne Scopus atty negizgi ónimderge Qazaqstannyń 263 kompanııasyna ulttyq lıtsenzııa berý boıynsha kelisimge kelmekpiz. Science Direct - Elsevier kompanııasynyń eń úzdik ǵylymı platformasy. Ol osy eldiń stýdentterine, zertteýshilerine, ǵylymı qyzmetkerlerine álemdegi eń baı ǵylymı bazasyna jol ashady. Ǵylymı málimetterdiń baı qory arqyly ǵalymdar ózine qajetti dúnıeni taba alady», - deıdi Chı Iongsýng.
Aıta keterligi, ScienceDirect - ǵylymı maqalalarǵa jol ashatyn aqyly saıt. 1997 jyly iske qosylǵan. Onda 2500 ǵylymı jýrnal men 26000 elektrondy kitap bar. Ol álemdegi tórt eń iri ǵylymı baspa úıleriniń biri sanalatyn «Elsevier» baspa úıine qaraıdy.
