Qazaqstandy jaqsy bilmese de, ónerimizge rıza boldy – Avstralııada óner kórsetken balerına

NUR-SULTAN. QazAqparat – Balet ártisi Shuǵyla Ádephan áriptesi Baqtııar Adamjanmen birge Avstralııada 10 kúni boıy óner kórsetip, elge jýyrda ǵana oraldy. «Astana Opera» balet teatrynyń solısi Shuǵyla QazAqparat tilshisimen sapar áserimen bólisti.

«Bul sapardan alǵan áserim sheksiz. Men buǵan deıin Ýkraına, Germanııa, Italııada óner kórsettim. Biraq, Avstralııanyń jóni bólek. Óıtkeni, ol jaqta balet ónerine degen suranys basqasha. Taǵy bir unaǵan tusy, biz óner kórsetip qana qoımaı, sheberlik sabaq aldyq. Avstralııanyń betke ustar balet mamandary óz tájirıbesimen bólisti. Men jas ártis bolǵandyqtan, maǵan úlken sabaq boldy», - dedi Shuǵyla Ádephan.

Sondaı-aq, ártis jergilikti halyqtyń Qazaqstan týraly surap, qyzyǵýshylyq tanytqanyn aıtty.

«Tanystyq barysynda Qazaqstannan ekenimdi aıtqanymda kóbisi tańǵalyp, elimiz týraly surap jatty. Jáne Qazaqstandy jaqyn tanymasa da, ónerimizge dán rıza boldy. Jalpy qazaqstandyq balet álemdik baletten erekshelenedi. Biz «Spartak» baletinen úzindi qoıdyq. Bul óte emotsıonaldy qoıylym. Sondyqtan da erekshe áser qaldyrdyq dep oılaımyn», - deıdi ol.

Buǵan deıin habarlaǵanymyzdaı, «Astana Opera» balet teatrynyń ártisteri Avstralııada óner kórsetip qaıtty.

«Ballet International Gala» atty álemdik deńgeıdegi gala kontsertinde óner kórsetýge Ortalyq Azııa elderinen Qazaqstan ǵana shaqyrtý alǵan.

Bizdiń ártister 26 qańtar men 5 aqpan aralyǵynda Avstralııanyń 2 qalasynda bolyp, ónerlerimen tánti etken.