Qazaqstandy zaıyrly memleket desek te, dindi qoǵamnan ysyryp tastaýǵa kelmeıdi - Q. Minýarov
ASTANA. 22 qarasha. QazAqparat - Biraz jyldan beri qaýzalǵanmen, memleket pen dinniń araqatynasy qandaı deńgeıde bolý kerek degen másele áli de zertteı berýdi qajet etetin tárizdi. Búgin Parlament Májilisinde ótken konferentsııa barysynda sóz sóılegen «Áziret Sultan» meshitiniń naıb ımamy Qýat Minýarov osylaı málim etti.
«Sebebi, dinı birlestikterdiń memleket aldyndaǵy mindetteri hám qoǵamdyq róli áli tolyqtaı naqtylanǵan joq. Osynyń áserinen bazbir dinı birlestikter úı ishinen úı tigip, beıne ózin táýelsiz sýbekti sezinýde. Sondyqtan Qazaqstandy zaıyrly memleket desek te, dindi qoǵamnan ysyryp tastaýǵa ıakı bóle-jaryp qarastyrýǵa kelmeıdi. Óıtkeni din - qoǵamdyq sananyń bir kórinisi», - dedi Q.Minýarov.
Onyń aıtýynsha, búgingi kúni ıdeologııalyq saladaǵy ózgerister, sotsıo-mádenı jáne saıası damýdyń jańa jaǵdaılarynyń qalyptasýy, ulttyq sana sezimniń ósýi jáne rýhanı, ulttyq qundylyqtardyń artýy qoǵamdyq-saıası ómirdegi dinniń rólin kúsheıtip keledi. Al dinniń kúsheıýimen dinı nanym-senim ıeleriniń óz senimine degen kózqarastary men ustanymdary da bekı túsýde.
«Memleketti basqarýdaǵy zaıyrly júıe - dindi moıyndamaıtyn, dinge qarsy jumys isteıtin júıe emes. Ókinishke qaraı, eldegi keıbir radıkaldy ustanymdaǵy adamdar arasynda zaıyrly júıeni dinge qarsy etip kórsetý áreketteri baıqalýda. Osydan kelip bılikke nemese bıliktiń kúshtik qurylymdaryna (quqyq qorǵaý organy ókilderine t.b.) óshigý faktileri týyndaýda. Sondyqtan qazirgi din máselesindegi ózekti tustardyń biri - zaıyrly júıe anyqtamasyn durys túsindirý bolyp otyrǵany shyndyq. Demokratııalyq baǵytty ustanǵan zaıyrly sıpattaǵy memleket bola otyryp biz búgin memlekettiń dinge oń kózqaraspen qaraıtynyna kýá bolýdamyz. Meshit qyzmetkeri retinde aıtar bolsam, Islam Yntymaqtastyǵy Uıymyna tóraǵalyǵymyz, kópvektorly saıasatymyzda musylman elderimen jaqyndastyǵymyz, respýblıkadaǵy sońǵy jyldardaǵy ózgerister: dintaný negizderin elektıvti pán retinde mektepterge (qazir joǵarǵy oqý oryndaryna da engizip jatyr) engizý, otandyq telearnalardan «Iman aınasy», «ıA verıý kz» sekildi birqatar mazmundy dinı baǵdarlamalardyń uıymdastyrylýy, Islam bilimi men mádenıetin qoldaý qorynyń jumys istep otyrǵany, dinı ádebıetterdiń mol tırajben kóptep jaryq kórýi, Astana qalamyzdaǵy «Nur Astana», «Áziret Sultan» sekildi kúmbezin kún súıgen kórkem meshitterdiń kóptep boı kóterýi, dintanýshy mamandardy daıarlaýǵa granttardyń kóp bólinýi, taǵysyn taǵylar - barlyǵy da memlekettiń dindi óristetýge jol ashyp otyrǵandyǵyn bildirýde. «Kórmes, túıeni de kórmes». Sondyqtan bunyń barlyǵyn kóre bilý kerek degim keledi», - dedi Q. Minýarov.
