Qazaqstandy velosıpedpen sharlap kele jatqan áıel Almatyǵa jetti

Kelinshek el aýmaǵyn sharlap júrgenine 4 aı bolǵan.

Onyń aıtýynsha, jolda ashyq aspan astynda túnep, ystyq shaımen buzylmaıtyn azyq-túlikpen qorektenip kelgen.

Aqmaral osy sapary úshin mansabyn da qıyp ketken. Aǵylshyn tilinen aýdarmashy retinde qyzmette joǵarylaı bastaǵanda  jumystan aryz jazyp shyǵyp ketken eken.

 «2014 jyly velosıpedpen júrýdi úırengen soń Qazaqstandy aralap shyqsam degen arman týdy. Anam men týǵan baýyrym qoldaý kórsetti. Basynda anam qatty ýaıymdaǵan. Únemi telefon shalyp turatyn. Keıin alańdamaıtyn boldy», - dedi ol.

Jolda Aqmaraldy neshe túrli qıyndyqty basynan ótkergen. Atap aıtqanda, aýa raıynyń qubylmalylyǵynan Aqmaral jolda sýyq ustap, aýyryp qalǵan.

Taýly qyratty jerlerge kelgende jaıaý órmeleýge týra kelgen.

«Almatyǵa jeteıin dep qalǵanda, 160 shaqyrym qashyqtyqty júre almadym. Sýyq jel boldy. Sondyqtan, avtostoppen jettim. Túnde ashyq aspan astynda uıyqtap júrdim. Qaladan qalaǵa velosıpedpen, qala ishinde kólikpen jettim. Búgin Almatyda qurbymnyń úıindemin. №11 emhanaǵa densaýlyǵymdy teksertýge keldim. Aılap qurǵaq aspen qorektengen soń as qorytý júıesi de syr bere bastady. Shyǵys Qazaqstanǵa jetkende tisim túsip qaldy. Qatty jótelip aýyrdym», - dedi Aqmaral.

Emhanada bilikti mamandar Aqmaraldyń densaýlyǵyn tolyǵymen tekserip, emdeý sharalaryn jazyp berdi.

Aqmaral sýyq túspeı Shyǵys Qazaqstannan ótip alýdy josparlaǵan.

«Qazaqstannyń tabıǵaty ǵajap, Shyǵys Qazaqstan, Baıanaýyl, Qarqaraly ulttyq parkteriniń peızajyna kóz toımaıdy. Ony kórgenime baqyttymyn», - dedi ol.

Aqmaral 2 aptadan soń saparyn jalǵastyrmaq. Alaıda, alǵashqy qar túsken kúni-aq velosıpedin jınap, úıine qaıtýdy oılastyrmaq.

Esterińizge sala keteıik, 1-30 qyrkúıek aralyǵynda Almatyda mektep medıtsınasy aılyǵy ótip jatyr. Osy aılyq aıasynda uıymdastyrylǵan kezdesýge 6 mektep oqýshylary qatysty.