Qazaqstandy sheteldik brendterdi jamylǵan reseılik taýarlar jaýlap aldy
ASTANA. QazAqparat - Búginde naryqtyq ekonomıka zańdary eskirdi. Álemde kognıtıvti ekonomıkaǵa negizi basymdyq beriledi. Ondaıda adamnyń psıhologııasyna áser etý arqyly taýar men qyzmetter satylady. Eksporttyq saıasatta dál osy kognıtıvti ekonomıkaǵa basymdyq bergen jón, dep habarlaıdy QazAqparat tilshisi.
«Qazaqstannyń memlekettik-jekeshelik seriktestik ortalyǵy» AQ basqarma tóraǵasy Azamat Oınarovtyń aıtýynsha, qazirgi kezde reseılik kásipkerler kognıtıvti ekonomıka negizderin ábden meńgerip alǵan. Olar sheteldik brendterdiń tutynýshynyń qalaýyna qatty áser etetinin jaqsy biledi. Sondyqtan óz taýarlaryn dál sol brendterdiń atymen satyp jatyr. «Máselen, Faberlic, Borg Elenberg, Pozalini, Carnaby jáne taǵy kóptegen brendter sheteldik taýarlar bolyp kórinse de, barlyǵy taza - reseılik taýarlar. Kórshi eldiń kásipkerleri tutynýshynyń nemistiń sapasyna senetinin jaqsy biledi. Sol sebepti tehnıkany Borg pen Elenberg-tiń markasymen satady. Kıim jaǵynan ıtalıandyqtardyń da oq boıy ozyq kele jatqany belgili. Sondyqtan Pozalini-diń brendi ótimdi ekenin ábden bilip alǵan. Endi, buryn Eýropanyń árbir memleketi óz brendin qalyptastyrýǵa tyrysty. Sol arqyly ózine ımıdj jasap aldy. Endi, reseılik kásipkerler sonyń barlyǵyn óz paıdasyna iske asyrýdy meńgerip aldy», - dedi Oınarov búgin eksportty damytýǵa arnalǵan jıynda.
Onyń aıtýynsha, atalǵan brendterdi qurǵan kezde óndiris oshaqtarynyń barlyǵy Qytaıda bolǵan. Qazir bárin Reseıge kóshirip aldy. «Biz ózimizdiń saýda ortalyqtarymyzdy aralap shyqtyq. Sonda barlyǵyna reseılik brendterdiń kirip alǵanyn baıqadyq. Sela - reseılik brend, INCITY -reseılik brend, Kanzler - reseılik brender. Ondaı býtıkter kóp. Qazaqstan da óz taýarlaryn eksportqa shyǵarǵanda kognıtıvti ekonomıkany jan-jaqty qoldanýy qajet»,- dep atap kórsetti ortalyq basshysy.
