Qazaqstandy irgeli ǵylymdar ortalyǵyna aınaldyrýymyz kerek - jas ǵalym
"Men Monǵolııada týǵan qazaqpyn. Qazaqstan táýelsizdik alǵanda, shette júrgen ár qazaqtyń maqsaty elge qaıtý boldy. Men de sol armanmen óstim. Qadirli Elbasy, Siz júrgizgen saıasattyń arqasynda syrttaǵy aǵaıynǵa elge qaraı jol ashyldy, ata-baba amanaty oryndaldy. Sondyqtan, barsha qandastarymyzdyń atynan Sizge alǵys aıtamyn. Monǵolııada, qansha yntam bolsa da, mektepke barý máselesi qıynshylyq týdyrdy. Mal baqtym. Qoı jaıyp júrip, kitap oqyp, esep shyǵaryp úırendim. Qaı mektepke jaqyn qonystanamyz, sol mektepke baryp emtıhan tapsyryp, orta bilimdi syrttaı bitirdim", - dedi ol.
Suraǵan Dórbethan atajurtqa 2005 jyly, 17 jasynda kelgen. Ulttyq biryńǵaı testileýge qatysyp, nátıjesinde Ál-Farabı atyndaǵy qazaq ulttyq ýnıversıtetiniń mehanıka-matematıka fakýltetine túsken. Ýnıversıtetti bitirgen soń, «Bolashaq» baǵdarlamasymen Ulybrıtanııada, Kıngs kolledjinde teorııalyq fızıka mamandyǵy boıynsha magıstratýrany úzdik aıaqtaǵan. 2 jyl Londondaǵy Imperıal kolledjinde ǵylymı jumyspen shuǵyldanǵan.
"Sodan elge qaıtyp, konkýrsqa qatysyp, Nazarbaev Ýnıversıtetine oqytýshy bolyp qabyldandym. Monǵolııada mal baǵyp júrip ósken men sııaqty balaǵa bir kezde Londonǵa baram, Nazarbaev Ýnıversıteti sııaqty ordada jumys isteımin degen oı túsine de kirmegen. Bul - oryndalǵan ǵajaıyp arman!" - dedi jas ǵalym.
Sonymen qatar ol QR Prezıdentiniń bastamasymen qurylǵan Nazarbaev ýnıversıteti - búgin álemdegi tanymal oqý oryndarynyń birine aınalǵanyn aıtty.
"Bizdiń oqytýshy-zertteýshilerimizdiń izdenisteri dúnıeniń eń basty ǵylymı basylymdarynda jaryq kórýde. Endi jastarymyz óz elinde halyqaralyq deńgeıde bilim alýǵa tolyq múmkindik aldy. 2018 jyly, meniń matematıka ǵylymyndaǵy zertteýime «Ferran Sunyer i Balaguer Prize» halyqaralyq syılyǵy berildi. Bul syılyq, álem boıynsha jylyna bir ret matematıka salasynda jazylǵan eń úzdik eńbekke beriledi. Sóıtip, Azııa elderinen shyqqan alǵashqy júldeger jáne syılyq tarıhyndaǵy eń jas ǵalym atandym", - dedi ol.
Onyń paıymynsha, irgeli ǵylym - ult mereıi, ol sapaly joǵary bilimniń tiregi, elimizdiń adamı kapıtalynyń negizgi kórsetkishi.
"Endeshe biz onyń damýyna múddeli bolýymyz kerek! Biz Qazaqstandy irgeli ǵylymdar ortalyǵyna aınaldyrýymyz kerek! Bul - qoldan keletin naqty is! Men jastardy osyǵan shaqyramyn", - dedi ǵalym.
